ახალქალაქის, კუმურდოსა და კარის მიტროპოლიტი ნიკოლოზი, რომელიც კოვიდინფიცირებულია აცხადებს, რომ ღამით ქუჩაში დადის. მისი მტკიცებით, ახალქალაქში საღამოს ხალხი იშვიათადაა, ამიტომ ქუჩაში გასვლა პრობლემა არ არის.

ნიკოლოზი ამტკიცებს იმასაც, რომ სიარული კორონავირუსით ინფიცირებისას კარგია და ამის შესახებ ექიმმა უთხრა, მაშინ, როცა ეპიდემიოლოგები და NCDC-ის წევრები მოქალაქეებს მოუწოდებენ, რომ ინფიცირების შემთხვევაში დარჩნენ იზოლაციაში და არ შეუწყონ ხელი ვირუსის გავრცელებას.

"როგორც მოგახსენებთ, რასაც ვაკეთებდი, იმას ვაკეთებ და რა არის, ახლა ეს რაღაც. ეს რაღაც ის არის, რომ მე დიდი ხანია უკვე, რამდენი გითხრათ, რამენიმე წელია, ალბათ, 2-3 წელი, 4, ვცდილობ, რომ ვიმოძრაო, ანუ ფეხით ვიარო. მე თავის დროზე ექიმმა დამინიშნა ეს ფეხით სიარული და მითხრა, რომ დღეში 2 საათი სწრაფი სიარული არის პირდაპირ ჩემი ჯანმრთელობის პირველი წამალი, ჩემი ავადმყოფობის გამო.

და ახლაც კი, მიუხედავად იმისა, რომ მე ახლა გადამდები ვარ, ამ წუთას, მიუხედავად ამისა, უცნაურია, აი ახალქალაქში გვაქვს საშუალება ღამე ფაქტიურად, სადღაც ცხრა საათის მერე ქალაქი არის მკვდარი სრულებით. არავინ არ არის გარეთ, მანქანა გაივლის ალბათ ერთი-ორი, ქუჩები არის ასფალტირებული, განიერი, განათებული და აი, ამ ქუჩაში შეიძლება შუა ქუჩაში სიარული ისე, რომ არც მანქანის საფრთხეა, არც ის, რომ ადამიანს შეხვდები, ამიტომ ყოველ საღამოს დავდივარ", — განაცხადა მან ვიდეომიმართვაში.

კორონავირუსით ინფიცირების შესახებ ნიკოლოზმა ვიდეომიმართვაში განაცხადა, რომელიც იუთუბის არხზე გაავრცელა. მისი თქმით, უკვე გამოუვლინდა სიმპტომები და დაუქვეითდა გემოსა და ყნოსვის შეგრძნება.

ნიკოლოზმა ვიდეომიმართვაში აღნიშნა ისიც, რომ მისი შემთხვევის შესახებ პირადად არის ინფორმირებული NCDC-ის ხელმძღვანელი ამირან გამყრელიძე და კორონავირუსთან ბრძოლაში ჩართული იქიმები, რომლებსაც პირადად იცნობს.

ნიკოლოზი ერთ-ერთი ყველაზე აქტიური მოწინააღმდეგე იყო კორონავირუსის გამო ეკლესიებში წირვა-ლოცვისა და ხალხმრავლობის შეზღუდვისა.

გაიგეთ მეტი კორონავირუსზე მისი შეხედულებების შესახებ:

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: