ქართული ოცნების წევრი და პარლამენტარი გია ვოლსკი, TV პირველის ეთერში, ნაციონალური მოძრაობიდან გამოყოფილი ფრთის შეფასებისას ამბობს, რომ ის სიმპათიით არის განწყობილი პარტია ევროპული საქართველოს ლოზუნგის მიმართ, თუმცა მის ქვეშ გაერთიანებული პირები, მისი თქმით, სააკაშვილთან ერთად ჩადიოდნენ დანაშაულებებს:

"ჩემი სიმპათია ლოზუნგის მიმართ ნამდვილად არის, მაგრამ ხალხი, საზოგადოება, რომელიც ამ ლოზუნგის ქვეშ გაერთიანდა, საქართველოში სააკაშვილთან ერთად ჩადიოდა გარკვეულ დანაშაულებებს. ასე რომ, მათ პასუხები უნდა გასცენ უამრავ კითხვას.

ლოზუნგი და იდეა სწორად აქვთ დანახული, მაგრამ ეს ჯერჯერობით იდეად რჩება და მათი და ნაციონალური მოძრაობის მთავარი ასპარეზი იქნება, ვინ უფრო მაგრად გალანძღავს ქართულ ოცნებას და ვინ უფრო დიდ დემაგოგიის კორიანტელს დააყენებს. თანამშრომლობას რაც შეეხება, მომავალში ვნახოთ. ერთსაც და მეორე მხარესაც ჯერ პასუხი აქვთ გასაცემი საკმაოდ მძიმე შეკითხვებზე".

ვოლსკის თქმით, ენმ-დან გამოყოფილი ფრთა, საპარლამენტო უმცირესობა - ევროპული საქართველო, სწორად მოიქცა, რომ 2016 წლის არჩევნები მსოფლიოსთან ერთად აღიარა, მისი თქმით, ხალხი რევოლუციისთვის დაღლილი იყო, მითუმეტეს "მიხეილ სააკაშვილის ლიდერობის პირობებში".

ვოლსკი აცხადებს, რომ გიგი უგულავას ციხიდან გამოსვლაში და ნაციონალური მოძრაობის გაყოფაში ყოფილი პრემიერი ბიძინა ივანიშვილი ან ქართული ოცნების რომელიმე წევრი არ მონაწილეობდა.