ევროპული საქართველოს ლიდერებმა, გიგა ბოკერიამ და სერგი კაპანაძემ ერთობლივი ბრიფინგი გამართეს, სადაც 2020 წლის არჩევნები შეადარეს წინა ორ საპარლამენტო არჩევნებს.

გიგა ბოკერიას თქმით, მიუხედავად იმისა რომ საზოგადოების დიდი ნაწილი და კომპეტენტური დამკვირვებლები თანხმდებიან, რომ არჩვენები არათავისუფალ გარემოში, დარღვევებით ჩატარდა, მაინც ჩნდება კითხვა, რატომ არ შედის ევროპული საქართველო პარლამენტში.

"ისმის ხოლმე კითხვები, მათ შორის ლეგიტიმური წყაროებიდანაც, თუ როგორ ვზომავთ, რამდენად დიდი იყო ამ დარღვევების ეფექტი საბოლოო შედეგზე. ისმის ხოლმე კითხვა, რა განსხვავება იყო ამ არჩევნებსა და 2016 წლის არჩევნებს, ან წინა საპარლამენტო არჩევნებს შორის, იმიტომ, რომ ჩვენ გვაქვს ტრადიცია სერიოზული პრობლემებისა საარჩევნო კამპანიის დროს.

პირველი არ არის ეს არჩევნები, სადაც პრობლემები იყო და რით გამოვარჩიეთ ჩვენ, ევროპულმა საქართველომ ეს არჩევნები, როდესაც მივიღეთ ასეთი გადაწყვეტილება, რომ პარლამენტში მონაწილეობას არ მივიღებთ. ეს ლეგიტიმური კითხვაა და ჩვენი აზრით იმ მაგალითებთან ერთად, რაც იხილა საზოგადოებამ ბოლო დღეების განმავლობაში, ძალიან საინტერესო იყო შეჯერება გარკვეული მონაცემების. რთულია ხშირად დაჭერა იმ ეფექტის, რაც მოაქვს დაშინებას, მოსყიდვას, და სხვა მეთოდებს. მიუხედავად ამისა, ჩვენმა გუნდმა, ძალიან თვალნათელი შედარება მოახდინა იმ მონაცემების, როგორია დინამიკა ამ პრობლემების, რომელიც არსებობდა და რამხელა მასშტაბი ჰქონდა ამ სამარცხვინო მეთოდებს, შედარებით წინა ორი საპარლამენტო არჩევნებისაგან", — განაცხადა ბოკერიამ.

სერგი კაპანაძის განცხადებით, როგორც დაუბალანსებელი უბნების, ისე ე.წ კარუსელების და ჩაყრილი ბიულეტენების რაოდენობა დრამატულად განსხვავდება წინა არჩევნების რაოდენობისაგან.

"ძალიან დიდია განსხვავება წინა წლებში არსებულ ანალოგიურ დარღვევებს შორის. აქ საუბარია ორი ტიპის პრობლემაზე — ერთი ეს არის ე.წ ბიძინას კაუსელი, სადაც ხმების გაკონტროლებ ხდება კარუსელის მეშვეობით და მეორე, ეს არის ჩაყრილი ბიულეტენები, ანუ სადაც ხდება უბრალოდ ბიულეტენების დამატება მმართველი პარტიის სასარგებლოდ", — ამბობს კაპანაძე.

მისი თქმით, 2012 და 2016 წლის საპარლამენტო არჩევნებთან შედარებით, იმ უბნების რაოდენობა, სადაც დაუბალანდებელი ოქმები დაიწერა, 20%-ით გაზრდილია. ევროპული საქართველოს საარჩევნო შტაბის ხელმძღვანელი, სხვა ტიპის დარღვევებზეც საუბრობს:

"ცარიელი კონვერტების რაოდენობა, რაც მიუთითებს კარუსელების არსებობას, არის გაზრდილი 300%-ით წინა არჩევნებთან შედარებით, ანუ დრამატული სხვაობაა. ეფექტი, რომელიც შეიძლება დამდგარიყო ამ კარუსელების გამო, არის ასევე 3-ჯერ მეტი, ანუ, დაახლოებით 210 ათასი ხმა იყო გაკონტროლებული ამ არჩევნებზე. ასევ გაზრდილია იმ უბნების რაოდენობა, სადაც მოხდა ასეთი ტიპის კარუსელების ამოქმედება წინა ორ არჩევნებთან შედარებით", — აცხადებს კაპანაძე.

კაპანაძის თქმით, გაყალბების მასშტაბმა საბოლოოდ შეცვალა ბალანსი არჩევნებში მონაწილე პარტიებს შორის.

ამ არჩევნების დროს მოხდა მასშტაბური გაყალბება. იყო ისეთი ტიპის კარუსელები, რომლებმაც გავლენა მოახდინა არჩევნების შედეგზე ფუნდამენტურად. გავლენა იყო დრამატული, რამაც შეცვალა ბალანსი იმას შორის, თუ ვინ მიიღო ხალხის მანდატი ქვეყნის სამართავად", — განაცხადა კაპანაძემ.