17 იანვარს, 18 საათზე, კანცელარიასთან აქცია გაიმართება ლოზუნგით, "დაისაჯონ ძაღლთა ბრძოლის ორგანიზატორები". ორგანიზატორების განცხადებით, აქცია ინტერნეტში გავრცელებული ძაღლების ჩხუბის ვიდეოს მიმართ გამოხმაურებაა.

ისინი მოითხოვენ, შინაგან საქმეთა სამინისტომ სათანადო ყურადღება მიაქციოს აღნიშნულ საქმეს.

აქციის ორგანიზატორების განცხადებას უცვლელად გთავაზობთ:

"მსგავსი ფაქტი სამწუხაროდ არაერთხელ მომხდარა და რეაგირება ყოველთვის არის ნული, სოციალურ ქსელში ვრცელდება ვიდეო, სადაც პირუტყვები არაადამიანურად ეპყრობიან ცხოველებს და ამ ყველაფერს შინაგან საქმეთა სამინისტრო ის გაატარებს როგორც არაფერი, გეგონება არაფერი არ მომხდარიყოს და ეს ჩვენი ინდეფერენტიზმის ბრალი იქნება! როცა არსებობს კანონი, ის კანონი უნდა კანონობდეს, მას ძალა უნდა ჰქონდეს, ძალას კი კანონებს ჩვენ ვაძლევთ, ეს მთავრობა კი ჩვენი დაქირავებულია, ჩვენ ვუხდით მათ ხელფასს, ხოდა ნება იბოძონ ტრაკი გაანძრიონ და ის არაადამიანები სათანადოდ დასაჯონ, აქ მარტო ამ კონკრეტულ შემთხვევაზე არაა საუბარი, აქ ჩვენ დამოკიდებულებაშია პრობლემა, თუ გვინდა ოდესმე დავემსგავსოთ ნორმალურ ქვეყანას, ამ ყველაფერზე უნდა გვქონდეს სათანადო რეაგირება".

ფეისბუკის მომხმარებელმა გიორგი ქალდანმა, მესტიიდან, ატვირთა ვიდეო, რომელშიც ჩანს რომ ორი "მეტისი" ძაღლი ერთმანეთს ეჩხუბება.

ვიდეოში ჩანს, რომ ერთ-ერთი ძაღლი თავს ესხმის მეორეს, კბენს და პირს არ უშვებს. ვიდეოში ჩანს, რომ მეორე ძაღლი დასახიჩრდა და დასისხლიანდა.