ბიუჯეტურმა ავიაკომპანია Wizz Air-მა რიგა-ქუთაისი-რიგის მიმართულებით ფრენები 19 დეკემბრამდე გააუქმა. ინფორმაცია ამის შესახებ სამოქალაქო ავიაციის სააგენტომ გავრცელა.

გარდა ამისა, Wizz Air-მა 18 დეკემბრამდე გადადო ფრენა დორტმუნდი-ქუთაისი-დორტმუნდის მიმართულებით.

გადადებულია ფრენა ვილნიუსი-ქუთაისი-ვილნიუსის მიმართულებითაც 2021 წლის 12 იანვრამდე.

როგორც განცხადებაშია ნათქვამი, რეგულარული რეისების გაუქმების მიზეზი ლატვიის, გერმანიისა და ლიეტუვას მიერ ადგილზე ეპიდსიტუაციის გაუარესების გამო დაწესებული სასაზღვრო და სანიტარული შეზღუდვებია.

ასევე, კორონავირუსით გამოწვეული შეზღუდვების გამო 28 ნოემბრამდე დანიშნული რეგულარული რეისები გააუქმა ავიაკომპანია AirBaltic-მა, თუმცა ავიაკომპანია შეასრულებს სარეპატრიაციო ფრენებს — საქართველოს მოქალაქეების ჩამოყვანის და უცხო ქვეყნის მოქალაქეების ქვეყნიდან გაყვანის მიზნით.

ცვლილებებია ავიაკომპანია Georgian Airways-ის ფრენის განრიგში. ავიაკომპანია თბილისი-ბერლინი-თბილისის და თბილისი-ვენა-თბილისის მიმართულებებზე ფრენებს გააგრძელებს მხოლოდ ერთი სიხშირით (კვირაში ერთი რეისი) შესაბამისად, თბილისი-ბერლინი-თბილისის საჰაერო ხაზზე გაუქმდება შემდეგი რიცხვების რეისები:

  • 6 ნოემბრის;
  • 13 ნოემბრის;
  • 20 ნოემბრის;
  • 27 ნოემბრის.

ხოლო თბილისი-ვენა-თბილისის საჰაერო ხაზზე გაუქმდება შემდეგი რიცხვების ფრენები:

  • 5 ნოემბრის;
  • 12 ნოემბრის;
  • 19 ნოემბრის;
  • 26 ნოემბრის.

საქართველოს სამოქალაქო ავიაციის სააგენტოს განცხადების თანახმად, გამომდინარე იქიდან, რომ პანდემიის პირობებში ავიაციის სექტორისთვის ვითარება რთულად პროგნოზირებადია და კვლავ წესდება სასაზღვრო და სანიტარული შეზღუდვები, მოქალაქეებს მოუწოდებენ, გამოიჩინონ სიფრთხილე მგზავრობის დაგეგმვის დროს; ასევე, ყურადღებით გაეცნონ დანიშნულების ქვეყნის მიერ დაწესებულ რეგულაციებს, ავიაკომპანიების შეტყობინებებს და ოფიციალურ წყაროებზე განთავსებულ განცხადებებსა და განრიგებს.