ფინანსთა მინისტრის, ივანე მაჭავარიანის განცხადებით, 31 არჩევნების სამართლიანად ჩატარდა და ამის შესახებ პოლიტიკოსებმაც იციან.

მთავრობის ადმინისტრაცია საკოორდინაციო საბჭოს სხდომის შემდეგ მაჭავარიანმა არჩევნების შედეგებზე ისაუბრა. როგორც იგი ამბობს, მოლოდინი იყო, რომ ნაციონალური მოძრაობა ნაკლებ ხმას აიღებდა და დანარჩენი პარტიები უფრო მეტ ხმას აიღებდნენ. მაჭავარიანის განმარტებით, ხმების სიმცირის გამო აღნიშნულ პარტიებს "პოლიტიკური დიაპაზონი ეზღუდებათ", რის გამოც იძულებული არიან, რადიკალიზმზე წავიდნენ.

"ის, რომ მათ შეეზღუდათ დიაპაზონი ამიტომ ვთქვათ, რომ არჩევნები გაყალბდა... ისიც, სუყველამ იცის, დამერწმუნეთ, ყველამ პოლიტიკურ ელიტაში იცის, რომ არჩევნები არ გაყალბებულა და რეალურ სურათს ასახავს", — აღნიშნა მაჭავარიანმა.

მისივე თქმით, შედეგების ლეგიტიმაციის კითხვის ნიშნის ქვეშ დაყენება ძვირად უჯდება ქვეყანას როგორც ეკონომიკის, ისე ეპიდსიტუაციის თვალსაზრისით.