ყირგიზეთში, დედაქალაქ ბიშკეკიდან 25 კილომეტრში ჩამოვარდა თურქული ავიაკომპანია ACT Airlines-ის კუთვნილი ბოინგ 747, რომელიც ჰონგ კონგიდან სტამბოლში, ბიშკეკის გავლით მიფრინავდა.

სატვირთო თვითმფრინავის ჩამოვარდნას, ბოლო ინფორმაციით, 30-ზე მეტი ადამიანი ემსხვერპლა. მსხვერპლთა უმრავლესობას ადგილობრივი მოსახლეობა წარმოადგენს, რადგან თვითმფრინავი დასახლებულ რაიონში ჩამოვარდა. ყირგიზეთის მთავრობის ცნობით, დაღუპულთა შორის არიან ბავშვებიც, მსხვერპლის რიცხვი კი შეიძლება ისევ გაიზარდოს, რადგან სამაშველო სამუშაოები ამ წუთებშიც მიმდინარეობს. ჩამოვარდნის მომენტში, სამუშაო საათები ჯერ დაწყებული არ იყო, შესაბამისად, მსხვერპლთა უმრავლესობას, სავარაუდოდ, საკუთარ სახლებში ეძინა. ავიაკატასტროფის სავარაუდო მიზეზად რთული მეტეოროლოგიური პირობები სახელდება.

საერთაშორისო და ადგილობრივმა, ყირგიზულმა მედიასაშუალებებმა თავდაპირველად გაავრცელეს ინფორმაცია, რომ თვითმფრინავი თურქეთის ავიახაზებს ეკუთვნოდა. ავიაკომპანიამ სპეციალური განცხადება გაავრცელა, სადაც წერს, რომ არც თვითმფრინავი და არც ეკიპაჟი არ ეკუთვნოდა თურქეთის ავიახაზებს. თუმცა, ჩამოვარდნილი ბოინგ 747 რეისს ასრულებდა თურქეთის ავიახაზების სარეისო ნომრით TK6491.

ACT Airlines თურქეთში 2004 წელს დაფუძნებული ავიაკომპანიაა, რომელიც მხოლოდ სატვირთო გადაზიდვებს ახორციელებს.