პოლიციამ დმანისის მუნიციპალიტეტის სოფელ ჯავახის მიმდებარე ტერიტორიაზე ერთი პირი დააკავა. მას ბრალად ერთი პირის ჯანმრთელობის განზრახ ნაკლებად მძიმე დაზიანება და ცეცხლსასროლი იარაღის უკანონო შეძენა-შენახვა-ტარება ედება. შსს-ს ცნობით, გამოძიებით დადგინდა, რომ ბრალდებულმა მიმდინარე წლის პირველ ნოემბერს, ჯავახის მიმდებარე ტერიტორიაზე, ურთიერთშელაპარაკებისას, თავისი ნათესავი, დმანისის საკრებულოს თავმჯდომარე ცეცხლსასროლი იარაღიდან გასროლით ფეხის არეში დაჭრა და შემთხვევის ადგილიდან მიიმალა.

უწყებაში აცხადებენ, რომ დაჭრილი კაცის სიცოცხლეს საფრთხე არ ემუქრება.

"პოლიციამ დანაშაულის ჩადენის იარაღი — ცეცხლსასროლი პისტოლეტი ნივთმტკიცების სახით ამოიღო", — აცხადებენ შინაგან საქმეთა სამინისტროში.

მათივე ინფორმაციით, გამოძიება საქართველოს სისხლის სამართლის კოდექსის 118-ე და 236-ე მუხლებით მიმდინარეობს.

დმანისის მუნიციპალიტეტში საკრებულოს თავმჯდომარე, პირველ ნოემბერს, დაჭრეს. ის ნაციონალური მოძრაობის წევრის, კახა ოქრიაშვილის ნათესავია.