ფრაქცია ქართული ოცნების თავმჯდომარის მოადგილემ, დავით მათიკაშვილმა ნიკა მელიას მიერ სამაჯურის მოხსნაზე განაცხადა, რომ "დემოკრატიულ, ლმობიერ და ჰუმანურ საკანონმდებლო სივრცეში ვიმყოფებით, ამიტომ ყველამ კეთილი უნდა ინებოს და წესები დაიცვას".

"დღეს რომ ის რეჟიმი იყოს და ის პერიოდი იყოს, რა პოლიტიკურ ძალასაც ნიკანორ მელია წარმოადგენს, მას ციხიდან არ გამოასუნინებდნენ, ზუსტად ვიცი. მას კი არ შეეცვალა და გაუუქმდა, მას გაუმკაცრდა. "ბრასლეტით" სიარულია უმჯობესი თუ 40 000 ლარის მოპოვება, მოძიება და შესაბამის ანგარიშზე შეტანა, რომელი უფრო მძიმეა, მოდი, ამაზე საზოგადოებამ იმსჯელოს", — განაცხადა დავით მათიკაშვილმა.

ნაციონალური მოძრაობის ლიდერმა, ნიკა მელიამ 1 ნოემბერს საპროტესტო აქციაზე ელექტროსამაჯური მოიხსნა. როგორც მელიამ განაცხადა, სამაჯურის ტარებას აღარ აპირებს.

"ეს არის უსამართლობის სიმბოლო. ეს არის ძალადობრივი სამაჯური, რომელსაც მე აღარ შევიბამ. გამორიცხულია. ზუსტად ვიცი, ვიჯდები მე ციხეში თუ ვიქნები თქვენთან ერთად იმ ბრძოლაში უახლოეს დღეებში, ერი გაიმარჯვებს", — განაცხადა ნიკა მელიამ.

ნიკა მელიას ელექტროსამაჯური 2019 წლის ივლისში გაუკეთეს და ნიკა მელიას სახლიდან გასვლასა-შესვლას აფიქსირებდა.

პროკურატურა ნიკა მელიას 20 ივნისს ძალადობრივი ჯგუფის შექმნას ედავება. სასამართლომ მელიას აღკვეთის ღონისძიების სახით 30 ათასი ლარის ოდენობის გირაო შეუფარდა.

საქართველოში საპარლამენტო არჩევნები 31 ოქტომბერს ჩატარდა. არჩევნების შედეგების ლეგიტიმურობას უარყოფს ბარიერგადალახული რვავე ოპოზიციური პარტია და 1 ნოემბრიდან, ყოველდღიურად აქციებს მართავს. ოპოზიციური პარტიები პარლამენტში შესვლაზე უარს აცხადებენ და რიგგარეშე არჩევნებს ითხოვენ.

ამავე თემაზე: