ევროპული საქართველო ნაციონალური მოძრაობის წევრის თინა ბოკუჩავას განცხადებას ეხმიანება. პრესსპიკერის მიერ გავრცელებული განცხადებით, ფრაქცია ევროპული საქართველო არ უშლის ხელს ენმ-ს ფრაქციის შექმნაში, არამედ, ისინი მზად არიან ტექნიკური კონსულტაციები გაუწიონ ენმ-ის წარმომადგენლებს პარლამენტში:

"ჩვენი ამოცანა ნამდვილად არ არის ენმ-ისთვის პარლამენტის ფარგლებში საქმიანობისთვის ხელის შეშლა. ამ საკითხთან დაკავშირებით არსებობს იურიდიული დეტალები, რომლებიც შეიძლება ერთი შეხედვით გაუგებარი იყოს ჩაუხედავი პირისთვის, თუმცა ჩვენ მზად ვართ ამ თემასთან დაკავშირებით ტექნიკური კონსულტაციები გავუწიოთ ენმ-ის წარმომადგენლებს პარლამენტში. ამ მიზნით ჩვენ მზად ვართ ორმხრივ რეჟიმში გვქონდეს ურთიერთობები ენმ-ის წარმომადგენლებთან, საჯარო სივრცეში აზრთა სხვადასხვაობის გადმოტანის გარეშე".

მათივე თქმით, პარტიის გაყოფის დღეს გაჟღერებული განცხადება სწორედ იმისკენ იყო მიმართული, რომ მათ შორის ტექნიკური და იურიდიული საკითხები დარეგულირებულიყო:

"სერგო რატიანმა ენმ-ს თანამდებობაზე დარჩენა და იურიდიული საკითხების მოგვარება შესთავაზა, სწორედ ამიტომ დროულად გადაირიცხა თანხა სპორტის სასახლისთვის, რათა ხელი არ შეშლოდა 20 იანვრის "ყრილობის" ჩატარებას".

ნაციონალური მოძრაობის წევრი თინა ბოკუჩავა პარტიიდან წასულ წევრებს ამომრჩევლის დაბნევაში ადანაშაულებს. ამის შესახებ მან დღეს, 15 იანვარს გამართულ ბრიფინგზე ისაუბრა. მისი თქმით, მიუხედავად პარტიის დატოვებისა, ევროპული საქართველოს წევრები არ ტოვებენ ენმ-ის ფრაქციას პარლამენტში. მისივე განცხადებით, ახალი პარტიის წარმომადგენლები ამას თანამდებობების შესანარჩუნებლად აკეთებენ