ქართული ოცნების წევრის, ანრი ოხანაშვილის განცხადებით, ნაციონალური მოძრაობის ერთ-ერთი ლიდერის, ნიკა მელიას პოლიტიკურ დევნაზე საუბარი "აბსურდია", რადგან ყველამ პირდაპირ ეთერში ვნახეთ, როგორ დაარღვია მელიამ სასამართლოს გადაწყვეტილება. ოხანაშვილის თქმით, ლოგიკურია, რომ პასუხისმგებლობა დაეკისროს ადამიანს, ვინც არ ემორჩილება კანონს.

"ხომ ყველა პირდაპირ ეთერში ვიხილეთ, დემონსტრაციულად სამაჯურის მოხსნა და გადაგდება? ეს არის სასამართლოს მიერ დაკისრებული მოვალეობის არაკეთილსინდისიერად შესრულება და პირობის დარღვევა. არსებობს სამართლებრივი მექანიზმი, როდესაც პირს, ვისაც აქვს დაკისრებული შესაბამისი პასუხისმგებლობა, ამ შემთხევაში, გირაოს სახით და არღვევს ამ პირობებს, პროკურატურა უფლებაომისილია სისხლის სამართლის საპროცესო კოდექსიდან გამომდინარე, იშუამდგომლოს სასამართლოს წინაშე შესაბამისი პირობით. ამიტომ ეს არის მხოლოდ და მხოლოდ სამართლებირივი საკითხი [...] რა სახის იქნება და რას მოითხოვს პროკურატურა ეს არის პროკურატურის შეფასების საგანი, რომელიც სასამართლომ უნდა განიხილოს", — განაცხადა ოხანაშვილმა.

პროკურატურა ნიკა მელიასთვის აღკვეთის ღონისძიების გამკაცრებას ითხოვს. მათი განცხადებით, მელიამ სამაჯურის მოხსნით აღკვეთის ღონისძიებები დაარღვია და უფრო მკაცრი ღონისძიებით სასამართლოს სწორედ ამიტომ მიმართეს.

აღკვეთის ღონისძიების შეცვლის შესახებ პროცესი დღეს 5 საათზე თბილისის საქალაქო სასამართლოში გაიმართება.

1 ნოემბერს ნაციონალური მოძრაობის ლიდერმა, ნიკა მელიამ საპროტესტო აქციაზე ელქტროსამაჯური მოიხსნა. როგორც ის ამბობს, სამაჯურის ტარებას აღარ აპირებს.

"ეს არის უსამართლობის სიმბოლო. ეს არის ძალადობრივი სამაჯური, რომელსაც მე აღარ შევიბამ. გამორიცხულია. ზუსტად ვიცი, ვიჯდები მე ციხეში თუ ვიქნები თქვენთან ერთად იმ ბრძოლაში უახლოეს დღეებში, ერი გაიმარჯვებს", — განაცხადა ნიკა მელიამ.