საქართველოს ახალგაზრდა იურისტთა ასოციაციის ინფორმაციით, კენჭისყრის დღეს და შემდგომ პერიოდში მათ 304 საჩივარი წარადგინეს. ორგანიზაციის განცხადებით, წარდგენილი საჩივრებიდან ისინი 117 უბნის შემაჯამებელი ოქმების ბათილობას და მონაცემების ხელახლა გადათვლას ითხოვენ.

"გასაჩივრებული ოქმების უმრავლესობაში ფიქსირდება დისბალანსი ან/და ოქმების გადასწორების ფაქტები. საოლქო საარჩევნო კომისიებმა წარდგენილი საჩივრები 2 დღის ვადაში უნდა განიხილონ", — აცხადებენ საიაში.

საიას ცნობითვე, 131 საჩივარი კენჭისყრის ან ხმის დათვლის პროცედურის დარღვევას შეეხება, ხოლო 173 — შემაჯამებელ ოქმებში დაფიქსირებულ დარღვევებს.

საპარლამენტო არჩევნები საქართველოში 31 ოქტომბერს ჩატარდა. არჩევნები წელს პირველად პროპორციულთან მიახლოებული, 120/30-ზე სისტემით გაიმართა. ცესკოს გამოცხადებულ შედეგებს ოპოზიცია არ აღიარებს და პერმანენტულად აქციებს გეგმავს.