ვიცე-პრემიერმა მაია ცქიტიშვილმა განაცხადა, რომ კორონავირუსით ინფიცირებულ პრემიერმინისტრს, გიორგი გახარიას, კონტაქტი არ ჰქონია, არც ქართული ოცნების ლიდერთან, ბიძინა ივანიშვილთან და არც მთავრობის სხვა წევრებთან.

"შაბათს არჩევნების დღეს, ჩვენ ყველამ დილით ვნახეთ გიორგი გახარია, რომელმაც მისცა ხმა მის საარჩევნო უბანზე. მას დილით ჰქონდა კონტაქტი თავის დაცვის წევრთან, მათ ერთად იმგზავრეს ერთი მანქანით. მოგვიანებით გახდა ცნობილი, რომ ეს ადამიანი [დაცვის წევრი] არის ინფიცირებული, შესაბამისად, ბატონი გიორგი მაშინვე გადავიდა თვითიზოლაციაში. კიდევ ერთხელ ვამბობ, რომ მას არ ჰქონდა შეხება არც ბატონ ბიძინასთან, არც მთავრობის სხვა წევრთან", — აღნიშნა ცქიტიშვილმა.

2 ნოემბერს საქართველოს პრემიერმინისტრ გიორგი გახარიას კორონავირუსი დაუდასტურდა.