ქართული ოცნების აღმასრულებელი მდივნის, ირაკლი კობახიძის თქმით, ერთიანი ნაციონალური მოძრაობის ერთ-ერთ ლიდერს, ნიკა მელიას მისთვის არ დაურეკავს, რაც იმას ნიშნავს, რომ ის დამარცხდა.

"არ დაურეკავს, ერთი საათი გავიდა და არ დაურეკავს. რომ გაემარჯვა დარეკავდა, მაგრამ ერთი საათი გავიდა და არ დაურეკავს, ვერ გაბედა. ის რომ ყოფილიყო კაცი, თავიდანვე იტყოდა, რომ წაგების შემთხვევაში, მაგალითად, დატოვებდა მანდატს, მაგრამ ვერ გაბედა. რატომ ვერ გაბედა, იმიტომ რომ იცოდა, წააგებდა", — განაცხადა კობახიძემ.

მანამდე კობახიძემ განაცხადა, რომ ის პოლიტიკიდან წავა, თუ ნიკა მელია, გიორგი ბოტკოველი და ლევან ხაბეიშვილი არჩევნებს მოიგენენ. რაზეც დღეს მელიამ უპასუხა, რომ მოიპოვა კობახიძის ტელეფონის ნომერი და მასთან დაკავშირებას პირადად აპირებდა.

ეგზიტპოლების შესახებ

არჩევნების დღეს ეგზიტპოლები დამოუკიდებელმა ორგანიზაციებმა, მედიებმა და ISFED-მა ჩაატარეს. მათი შედეგები 8 საათზე გავრცელდა.

  • წელს არჩევნებზე ეგზიტპოლს ამერიკულ კომპანია Edison Research ტელეკომპანია ფორმულას დაკვეთით ატარებს.
  • მთავარი არხისთვის ეგზიტპოლებს ატარებს ფრანგული კომპანია IPSOS.
  • რუსთავი 2-სთვის ეგზიტპოლებს ბრიტანული კვლევითი კომპანია Survation ატარებს.
  • ტელეკომპანია იმედის დაკვეთით კი ეგზიტპოლებს ამერიკული კომპანია Public Opinion Strategies ატარებს.

არჩევნების დღეს ხმებს პარალელურად ითვლის არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოებაც (ISFED).

ედისონს საქართველოში სხვადასხვა დროს აქვს ეგზიტპოლი ჩატარებული. იუსტიციის სამინისტროს მიერ გამოქვეყნებული ინფორმაციით, IPSOS 2019 წელს ატარებდა კვლევას საქართველოში სასამართლო რეფორმების შესაფასებლად. Survation და Public Opinion Strategies კი საქართველოში ეგზიტპოლებს პირველად ატარებენ.