ქართული ოცნების ერთ-ერთმა ლიდერმა, მამუკა მდინარაძე აცხადებს, რომ ამ არჩევნებში მათ გამარჯვებას "წყალი არ გაუვა".

"ყველა მონაცემით, რომელიც შემოდის ქართული ოცნების ცენტრალურ შტაბში, ქართული ოცნება იმარჯვებს დამაჯერებლად. უკვე წყალი არ გაუვა, როგორც იტყვიან, იმას, რომ ქართული ოცნების გამარჯვება გარდაუვალია, ოღონდ ამას სჭირდება ბოლომდე, მაქსიმალური აქტიურობა", — განაცხადა მდინარაძემ.

მისივე თქმით, თუ ანალოგიური აქტივობა იქნება დღის ბოლომდე, ქართულმა ოცნებამ შეიძლება მიიღოს შედეგი, რომელიც "ბევრს ვერც კი წარმოუდგენია".

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: