გლდანის 61-ე საარჩევნო უბნის მიმდებარე ტერიტორიაზე უცნობი პირები სიებით ხელში გადაადგილდებიან. ამის შესახებ ინფორმაციას ფორმულა ავრცელებს. მათ ჟურნალისტებს განუცხადეს, რომ ამ სიებში აქვთ უბნის დამკვირვებლების პირადი ნომრები, "რამე რომ არ მოხდეს".

მათი თქმით, ისინი აკონტროლებენ სიტუაციას, რათა ჩხუბი, ან სხვა რამე ინციდენტი არ მოხდეს. ჟურნალისტის კითხვას, ვის წარმოადგენენ, ან აღნიშნული სიები ვინ მიაწოდა მათ, თავს არიდებენ.

უბნის თავმჯდომარე ამბობს, რომ მათ დამკვირვებლების პირადი ინფორმაცა არავისთვის არ მიუწოდებიათ, ერთ-ერთმა დამკვირვებელმა კი თქვა, რომ აღნიშნული პირები ამომრჩევლის მოსყიდვას ცდილობენ. უბნის დამკვირვებლის თქმით, აღნიშნულთაგან ერთ-ერთი პირი თავისუფალი სტილით მოჭიდავეთა ნაკრების მწვრთნელია, მაგრამ, ზუსტი სახელის თქმისგან თავს იკავებს, რათა პრობლემები არ შეექმნას.

"პოლიციას სულ არ ედარდება", — ამბობს 61-ე უბნის დამკვირვებელი.

უბნაზე შეკრებილი პოლიციელები ამბობენ, რომ რაიმე დარღვევის შესახებ ინფორმაცია არ აქვთ.

"ჩვენ კომისიის თავმჯდომარემ უნდა მოგვმართოს, პატივცემულო" — უპასუხა ერთ-ერთმა მათგანმა ფორმულას ჟურნალისტს კითხვაზე, გაესაუბრა თუ არა იგი რომელიმე მათგანს.

ფორმულას გავრცელებულ კადრებში ჩანს, რომ ჟურნალისტების გამოჩენის შემდეგ, უცნობმა პირებმა გლდანის 61-ე საარჩევნო უბანი დატოვეს.