ადმინისტრაციული რესურსის გამოყენება, მოსყიდვა, საარჩევნო კამპანიაში ხელშეშლა და ზეწოლა — ამ დარღვევებზე საქართველოს ახალგაზრდა იურისტთა ასოციაციის სადამკვირვებლო მისიის ანგარიშშია საუბარი.

წინასაარჩევნო პროცესებს საია, გრძელვადიანი სადამკვირვებლო მისიის ფარგლებში, 9 რეგიონული მონიტორის მეშვეობით თბილისში, აჭარაში, გურიაში, სამეგრელო-ზემო სვანეთში, იმერეთში, შიდა და ქვემო ქართლში, მცხეთა-მთიანეთსა და კახეთში აკვირდება. 2020 წლის საპარლამენტო არჩევნების მესამე შუალედური ანგარიში 1-ლი ოქტომბრიდან 26 ოქტომბრამდე გამოვლენილ დარღვევებს ფარავს.

როგორც საია-ში აცხადებენ, სულ მათ დააფიქსირეს:

  • სახელმწიფოსა და მმართველი პარტიის გამიჯვნის მოთხოვნის უგულებელყოფის 1 შემთხვევა;
  • ადმინისტრაციული რესურსის გამოყენების 1 შემთხვევა;
  • ამომრჩევლის მოსყიდვის 2 შემთხვევა;
  • ზეწოლისა და ძალადობრივი ქმედებების, როგორც სავარაუდო ისე დადასტურებული, 8 შემთხვევა;
  • წინასაარჩევნო კამპანიის ხელშეშლის 2 შემთხვევა.

საია-ში აღნიშნავენ, რომ წინა თვეების მსგავსად, გამოწვევად რჩება სამთავრობო პროექტების პერსონიფიცირება და კონკრეტულ პარტიასთან აფილირება, რაც მმართველი პარტიის კამპანიის ნაწილად, ისევე როგორც, ამომრჩევლის ნებაზე მანიპულაციად აღიქმება.

ორგანიზაციაში აღნიშნავენ, რომ წინასაარჩევნო კამპანიამ ოქტომბერშიც ძალადობრივი დაპირისპირებების ფონზე ჩაიარა. ცხელი წერტილი, ამჯერად, შიდა და ქვემო ქართლი იყო. საია-ში მიაჩნიათ, რომ ეს შემთხვევები შეიცავს სისხლის სამართლის დანაშაულის ნიშნებს, რაც მალე უნდა გამოიძიონ.

რაც შეეხება ამომრჩევლის მოსყიდვა, ანგარიშში ნათქვამია, რომ ეს ქართული ოცნებისა და თავისუფალი საქართველოს ეხებოდა. როგორც საია-ში ამბობენ, წინასაარჩევნო კამპანიის ჩატარების დაბრკოლება სტრატეგია აღმაშენებელსა და ლელოს შეექმნათ.