COVID-19-ის მოწინავე ექსპერიმენტული ვაქცინა იმუნურ პასუხს კვლევაში მონაწილეთა ყველა ასაკობრივ ჯგუფში აღძრავს, აცხადებენ მისი შემქმნელები. ეს მეცნიერებსა და საზოგადოებას იმედს აძლევს, რომ აცრის გზით ყველაზე მოწყვლადი, ხანდაზმული ასაკის ადამიანების დაცვა შესაძლებელი გახდება.

ამ ეტაპზე, განცხადების დამადასტურებელ მტკიცებულებას არც ოქსფორდის უნივერსიტეტი და არც ფარმაკოლოგიური კომპანია AstraZeneca არ გამოაქვეყნებენ — მონაცემები აკადემიური სტატიის სახით გამოსაქვეყნებლად არის გადაგზავნილი. თუმცა, AstraZeneca-მ ექსპერიმენტული ვაქცინის AZD1222 კვლევის საბაზისო მიგნებები ვიწრო აკადემიურ წრეებს უკვე გააცნო.

მეორე ფაზის კვლევამ აჩვენა, რომ მასში მონაწილე 56 წელს ზემოთ და ზოგიერთ 70-ს გადაცილებულ მოხალისეში ვაქცინამ ანტისხეულების გამომუშავება ისევე წარმატებით შეძლო, როგორც ამას ახალგაზრდებში ახერხებდა. ვაქცინების შექმნის პროცესში ხანდაზმული ადამიანების დაცვა მეცნიერთა წინაშე მდგომი საკვანძო საკითხი გახლავთ. ორგანიზმის იმუნიტეტი და მისი ნებისმიერ ვირუსთან ბრძოლის უნარი ასაკის მატებასთან ერთად იკლებს. სწორედ ამის გამოა, რომ COVID-19-ის მსხვერპლთა უმეტესობას ხანშიშესული ადამიანები წარმოადგენენ.

კვლევის მონაცემები ასევე მიუთითებს, რომ მოხუც მოხალისეებს უფრო ცოტა გვერდითი ეფექტი (მეცნიერები ამას "რეაქტოგენურობას" უწოდებენ) გამოუვლინდათ, რაც სხეულის ტემპერატურის უმნიშვნელო მომატებასა და აცრილი ხელის ტკივილში გამოიხატა.

"იმედისმომცემია, რომ იმუნოგენური პასუხები მოხუც და ახალგაზრდა ადამიანებში მსგავსი იყო, ხოლო რეაქტოგენურობა ხანდაზმულებში, სადაც COVID-19-ის მწვავე მიმდინარეობა უფრო ხშირია — ნაკლები. აღნიშნული შედეგები AZD1222 ვაქცინის უსაფრთხოებისა და იმუნოგენურობის მტკიცებულებებად გამოდგება", — აღნიშნა AstraZeneca-ს წარმომადგენელმა.

მიუხედავად ამ ოპტიმისტური სიახლისა, ბევრს მიაჩნია, რომ ვაქცინა სრულ დაცვას ვერ უზრუნველყოფს. მათი აზრით, უფრო მეტად მოსალოდნელია, რომ მან დაავადების სიმწვავე შეამციროს, რაც ჰოსპიტალიზაციისა და სიკვდილიანობის სტატისტიკას შეამცირებს. არსებობს მოლოდინი, რომ ვაქცინით გამომუშავებული დაცვა ხანგრძლივი დროით არ შენარჩუნდება და განმეორებით აცრა იქნება საჭირო.

AstraZeneca იმედოვნებს, რომ უახლოეს თვეებში ვაქცინის შეზღუდული რაოდენობა ხელმისაწვდომი გახდება.

ჩვენ 2/3 კვლევის ეტაპის ეფექტიანობის შესახებ მონაცემებს წლის ბოლომდე დავამუშავებთ და თუ ქვეყნები შესაბამის ლიცენზიას გასცემენ, პოტენციური ვაქცინის დოზები გამოსაყენებლად უკვე წლის ბოლომდე იქნება ხელმისაწვდომი

AstraZeneca-ს ოფიციალური წარმომადგენელი

AstraZeneca-ს ვაქცინის მასიურ წარმოება აქვს გეგმაში. საწყის ეტაპზე მის მოცულობად 3 მლრდ დოზა მოიაზრება. ეს 1,5 მილიარდი ადამიანის სამყოფი ვაქცინა გახლავთ, რადგანაც ოქსფორდის ექსპერიმენტულ პროდუქტს ორგზის აცრა სჭირდება. კომპანიამ კონტრაქტი სხვა ქვეყნის მწარმოებლებთანაც გააფორმა.

ვაქცინის კვლევის დასკვნითი ეტაპი, მესამე ფაზა, მეცნიერებს საშუალებას მისცემს, აცრილთა და აუცრელთა სიკვდილიანობის სტატისტიკა ერთმანეთს შეადარონ და ამგვარად, მის პოპულაციურ ეფექტიანობაზე იმსჯელონ. ამჟამად, ვაქცინის აღნიშნული ეტაპის კვლევა 6 ქვეყანაში მიმდინარეობს. ესენია: დიდი ბრიტანეთი, ბრაზილია, იაპონია, ინდოეთი, სამხრეთ აფრიკა და აშშ.

ლონდონის ჰიგიენისა და ტროპიკული მედიცინის სკოლის ფარმაკოეპიდემიოლოგიის პროფესორი, სტივენ ევანსი აღნიშნავს, რომ მონაცემების გამოქვეყნებამდე წინასწარი დასკვნების გამოტანისგან თავი უნდა შევიკავოთ.

ზუსტი კომენტარის გასაკეთებლად ჩვენ მონაცემების ნახვა გვჭირდება. იმედისმომცემია, როცა მკვლევარები ვარაუდობენ, რომ სისხლში გაზომილი იმუნური პასუხი თავის ეფექტიანობას როგორც 70-ს წელს ზემოთ, ისე ქვემოთაც ავლენს. შემდგომი ფაზის კვლევა უკეთ გამოკვეთავს, თუ რამდენად აისახება იმუნური პასუხი ვაქცინის კლინიკურ ეფექტიანობასა და ინფიცირების პრევენციაზე. ამისათვის გაცილებით დიდი რიცხვებია საჭირო და უფრო ჭკვიანურია, თუ კვლევის დასრულებამდე ძალიან ოპტიმისტურადაც არ ვიქნებით განწყობილნი

სტივენ ევანსი, ლონდონის ჰიგიენისა და ტროპიკული მედიცინის სკოლის პროფესორი