ნაციონალური მოძრაობის ერთ-ერთი ლიდერის, ხატია დეკანოიძის განცხადებით, ამ ეტაპზე პარტია აქციის გამართვას თავისუფლების მოედანთან 29 ოქტომბერს გეგმავს. როგორც მან On.ge-ს უთხრა, ისინი 31 ოქტომბერს, საღამოს, ხმების დათვლის შემდეგ ერთად "იზეიმებენ ბიძინა ივანიშვილის დამარცხებას".

დღეს, მმართველი პარტიის ერთ-ერთმა ლიდერმა, მამუკა მდინარაძემ თქვა, რომ ნაციონალურმა მოძრაობამ თბილისის მერიაში 31 ოქტომბერს 12 საათისთვის აქციის გამართვასთან დაკავშირებით განაცხადი შეიტანა. On.ge-ს აღნიშნული მერიაში დაუდასტურეს და გვითხრეს, რომ 29-სა 31-ში აქციების გამართვასთან დაკავშირებით განცხადება მათთან შესულია.

2020 წლის 31 ოქტომბერს საქართველოში საპარლამენტო არჩევნები გაიმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ჩატარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.