ევროპული საქართველოს წევრმა და საარჩევნო შტაბის ხელმძღვანელმა, სერგი კაპანაძემ, განაცხადა, რომ ქართული ოცნებისთვის "პოლიტიკური ლოქდაუნის" კი არა, "პოლიტიკური ნოკაუტის" გაკეთებას აპირებენ. ამის შესახებ მან TV პირველის ეთერში ისაუბრა. კაპანაძე ასე ქართული ოცნების საარჩევნო სიის მესამე ნომრის, ირაკლი კობახიძის ნათქვამს გამოეხმაურა იმის თაობაზე, რომ მოსახლეობა "ლოქდაუნს" გამოუცხადებს ნაციონალურ მოძრაობასა და ევროპულ საქართველოს.

"ქართულ ოცნებას ძალიან ეშინია ევროპული საქართველოსი და ნაციონალური მოძრაობის იმიტომ, რომ იცის ძალიან კარგად, რომ ჩვენ ვაპირებთ მათთვის პოლიტიკური ლოქდაუნის კი არა, პოლიტიკური ნოკაუტის გაკეთებას და ეს მოხდება ამ შაბათს ძალიან მარტივად და ძალიან წყნარად", — განაცხადა კაპანაძემ.

ქართული ოცნების საარჩევნო სიის მესამე ნომრის, ირაკლი კობახიძემ დღეს განაცხადა, რომ 31 ოქტომბერს საქართველოს მოსახლეობა "ლოქდაუნს" გამოუცხადებს ნაციონალურ მოძრაობასა და ევროპულ საქართველოს. ასე გამოეხმაურა ის ევროპული საქართველოს ინფორმაციას იმის შესახებ, რომ 2 ნოემბერს მთავრობა "ლოქდაუნს" გეგმავს.