შინაგან საქმეთა სამინისტროს ცნობით, ზუგდიდში შეიარაღებული თავდასხმის საქმეზე დავით ხვიბლიანთან არაერთი საგამოძიებო მოქმედება ჩატარდა და ჩატარდება. ამის შესახებ შინაგან საქმეთა მინისტრის მოადგილემ, ვლადიმერ ბორცვაძემ სპეციალურ ბრიფინგზე განაცხადა.

დავით ხვიბლიანი ზუგდიდში შეიარაღებული თავდასხმის დროს აყვანილი 43 მძევლიდან ერთ-ერთი იყო. ნიკა გვარამიამ ხვიბლიანზე განაცხადა, რომ ის სინამდვილეში გამტაცებლის თანამზრახველი იყო.

შინაგან საქმეთა სამინისტრომ, დღეს, 26 ოქტომბერს დაადასტურა, რომ ზუგდიდში ბანკზე თავდამსხმელი ბადრი ესებუაა. მათი განცხადებით, მისი ადგილსამყოფელის დადგენისა და დაკავების მიზნით, სპეციალურ ოპერატიულ და სამძებრო მოქმედებებს განაგრძობს. მთავარი არხის ეთერში ნიკა გვარამიამ გუშინ, 25 ოქტომბერს განაცხადა, რომ 21 ოქტომბერს ზუგდიდში, საქართველოს ბანკში ბადრი ესებუა შეიჭრა

21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლების გარდა თავდამსხმელმა წაიყვანა სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. შეიარაღებულ პირთან მოლაპარაკებებს ის აწარმოებდა.

გაიგეთ მეტი: