შინაგან საქმეთა მინისტრი, ვახტანგ გომელაური ადასტურებს, რომ ზუგდიდში მძარცველმა თანხა წაიღო, თუმცა რამდენი, არ ამბობს. გომელაურმა ჟურნალისტებთან თქვა, რომ თანხას მნიშვნელობა არ აქვს.

"ჩემთვის და ჩვენი ხელისუფლებისთვის, უმნიშვნელოვანესია ადამიანის სიცოცხლე, არანაირი თანხა არსებობს ადამიანის სიცოცხლის საფასურად. ეს იქნება ათი მილიონი, ასი მილიონი დიდი მნიშვნელობა ამას არ აქვს. დიდი მნიშვნელობა არ აქვს... კი ბატონო, კი შესრულდა... რა მნიშვნელობა აქვს, რამდენი წაიღო?" — პასუხობს ის ჟურნალისტების კითხვას.

გარდა ამისა, გომელაურმა განაცხადა, რომ თანხა ბიუჯეტის არაა და საქართველოს ბანკისაა.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: