ევროპარლამენტის მიერ დაწესებული ანდრეი სახაროვის პრემიის 2020 წლის ლაურეატი ბელარუსის ოპიზიცია გახდა. ევროპარლამენტის თავმჯდომარე, დევიდ სასოლიმ ტვიტერზე დაწერა, რომ ბელარუსის ოპოზიციის მხარეს არის ის, რისი დამარცხებაც აგრესიულ ძალას არ შეუძლია — სიმართლე.

"არ დანდებდეთ ამ ბრძოლაში. ჩვენ თქვენ გვერდით ვართ", — წერს ევროპარლამენტის თავმჯდომარე.

მედუზას ცნობით, ლაურეატების სიაში მოხვდნენ საკოორდინაციო საბჭოს წევრები:

  • სვეტლანა ტიხანოვსკაია;
  • სვეტლანა ალექსიევიჩი;
  • მარია კოლესნიკოვა;
  • ოლღა კოვალკოვა;
  • ვერონიკა ცეპკალო;
  • სერგეი ტიხანოვსკი;
  • ალეს ბელიაცკიი;
  • სერგეი დილევსკიი;
  • სტეპან პუტილო და
  • ნიკოლაი სტატკევიჩი.

სახაროვის პრემია 1988 წლიდან გაიცემა. მისი საპრიზო ფონდი 50 000 ევროს წარმოადგენს. სხვადასხვა დროს პრემიის ლაურეატები იყვნენ: ნელსონ მანდელა, კოფი ანანი და სხვა.

საპროტესტო აქციების პარალელურად ალექსანდრე ლუკაშენკოს ხელისუფლების მხრიდან რეპრესიები კვლავ გრძელდება. აქციებზე აკავებენ ათეულობით ადამიანს, ოპოზიციის წევრებს კი დაკითხვებზე იბარებენ.

9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.