შარვალ-კოსტიუმი დიდხანს ითვლებოდა ყველაზე შესაფერის ოფიციალურ სამოსად, თუმცა 2020 წელს სხვა ბევრი რამის მსგავსად ამ მოცემულობამაც განიცადა ცვლილება.

ბოლო თვეების განმავლობაში უმეტესი ჩვენგანის სამუშაო თუ სასწავლო პროცესის ძირითადმა ნაწილმა ოფისებიდან და უნივერსიტეტებიდან სახლებში გადმოინაცვლა, რასაც, ალბათ, იმდენივე უარყოფითი ეფექტი აქვს, რამდენიც დადებითი. თუმცა, ერთი რამ ცხადია: ყოველ დილით ნაკლებად გვიწევს ფიქრი, თუ რა ჩავიცვათ დღეს.

ყოველ შემთხვევაში, წელს ქვევით მაინც...

ფოტო: Tenor

ამ მოცემულობის საპასუხოდ კანადურმა ტანსაცმლის ბრენდმა Henri Vézina სარეკლამო კამპანია წამოიწყო, რომელიც ახალ კოლექციას "სახლიდან მუშაობა" გვაცნობს.

ფოტო: Henri Vezina

კანადური ბრენდის ახალი კოლექციის სარეკლამო ფოტოები ვებგვერდზე Ads of the World გამოჩნდა და მის შექმნაზე სარეკლამო კომპანია Dentsu-მ იმუშავა.

როგორც ხედავთ, ახალი კოლექცია წარმოგვიდგენს კაც მოდელებს, რომელთაც პირდაპირი გაგებით ნახევრად ფორმალური სამოსი აცვიათ.

ფოტო: Henri Vezina

სიმართლეს რომ თვალი გავუსწოროთ, დღეს Zoom-ში გამართულ თუნდაც ძალიან საქმიან შეხვედრებზე მაინც ვერავინ შენიშნავს, თუ რა გვაცვია წელს ქვევით, შესაბამისად, ეს ბრენდი ნამდვილად საჭირო და შესაფერის გამოსავალს გვთავაზობს.

თუმცა გახსოვდეთ, რომ ისეთი გამოუსწორებელი შეცდომაც არ უნდა დაუშვათ, როგორიც ჟურნალ New Yorker-ის თანამშრომელს მოუვიდა.

ფოტო: Henri Vezina

ივნისში მსგავსი კამპანია წამოიწყო კიდევ ერთმა კომპანიამ Prisma, რომელიც არა მხოლოდ კაცების, არამედ ქალების "ნახევრად ფორმალურ" კოლექციას სთავაზობს დაინტერესებულ პირებს.

ფოტო: Joni Furstenborg

"შესაძლოა, სასაცილო ჩანს, მაგრამ რეალობა ნამდვილად ასეთია. ერთმანეთთან ძირითადად სოციალური მედიის საშუალებით დაკავშირებისას ეს იქცა ნორმად", — განაცხადა Prisma-ს წარმომადგენელმა.

ფოტო: Joni Furstenborg