ჟურნალ New Yorker-მა მისი ერთ-ერთი ყველაზე დიდი ხნის თანამშრომელი, სამართლის ექსპერტი ჯეფრი ტუბინი დაითხოვა მას შემდეგ, რაც ამ უკანასკნელმა სამსახურში Zoom-ით ჩართვის დროს მასტურბაცია დაიწყო.

"სამარცხვინოდ სულელური შეცდომა მომივიდა და მეგონა, რომ კამერა გამორთული იყო", — განაცხადა ტუბინმა ორშაბათს, 19 ოქტომბერს, მომხდართან დაკავშირებით და დაამატა: "ბოდიშს ვუხდი ჩემს ცოლს, ოჯახს, მეგობრებსა და თანამშრომლებს. მეგონა, რომ Zoom-ის ვიდეოსთვის ხმა გამორთული მქონდა და რომ ვერავინ მხედავდა".

დეტალების დადასტურებაზე ტუბინმა ჯერჯერობით უარი განაცხადა.

ტუბინი აშშ-ში ერთ-ერთი ყველაზე ცნობილი სამართლის ექსპერტია. ის New Yorker-ში 25 წელი მუშაობდა, ასევე CNN-ის მთავარი სამართლის ექსპერტია.

ჟურნალმა განაცხადა, რომ ტუბინი "საკითხის გამოძიებამდე დროებით სამსახურიდან გაათავისუფლეს". თანამშრომლებისთვის გაგზავნილ ელექტრონულ წერილში New Yorker-ის რედაქტორი დევიდ რემნიკი წერს:

"მოგესალმებით. როგორც დღევანდელ ახალ ამბებში წაიკითხავდი, ჩვენი ერთ-ერთი მწერალი ჯეფ ტუბინი წინა კვირის Zoom-ის ინციდენტის შემდეგ დროებით სამსახურიდან გავათავისუფლეთ. გთხოვთ, დარწმუნებული იყოთ, რომ მსგავს შემთხვევებს სერიოზულად ვუდგებით და გამოძიებას ვაწარმოებთ".

CNN-მა განაცხადა, რომ ტუბინმა "დროებით სამსახურის საქმეებისგან გათავისუფლება ითხოვა პირადი მიზეზებით, რისი შესაძლებლობაც მას მივეცით".

როგორც ირკვევა, ონლაინ ზარში ჩართულნი იყვნენ როგორც ჟურნალის თანამშრომლები, ისე ნიუ-იორკის რადიოსადგურის, WNYC-ის, პერსონალი.

Zoom-ის ვიდეოჩატის სერვისი დიდ ჯგუფებს საერთო ზარში საუბრისა და ვიდეოთი გამოჩენის შესაძლებლობას აძლევს, თუმცა მომხმარებლებს აგრეთვე შეუძლიათ, გამორთონ მიკროფონი და კამერა, თუკი მათ არ სურთ, რომ გამოჩნდნენ ან მათი ხმა ისმოდეს.

უხერხული შემთხვევები და ტექნიკური შეცდომები არც ისე იშვიათი გახდა მას შემდეგ, რაც Zoom-ის სერვისის პოპულარობა კორონავირუსის პანდემიამ გაზარდა. აქამდე ესპანეთსა და ბრაზილიაშიც იყო ინციდენტები, როცა საჯარო პირებს Zoom-ის შეხვედრაში ჩართვისას კამერა და ხმა ჩართული დარჩათ, როცა ბანაობდნენ.