ზუგდიდში საქართველოს ბანკში შეჭრილი თავდამსხმელი მძევლების შუამავლობით ტელევიზიებს, მთავარ არხსა და ფორმულას, დაუკავშირდა და მოთხოვნები წამოაყენა. ის ნახევარ მილიონს დოლარს, შეუიარაღებელი მომლაპარაკებლის შესვლასა და უსაფრთხოების გარანტიებს მოითხოვს.

ვიდეოზარით მძევალი პირდაპირ ეთერში ჩაერთო ტელეკომპანია მთავარ არხს და აჩვენა სიტუაცია ოთახში. კადრში ჩანს შეიარაღებული, სამხედრო ფორმაში ჩაცმული, ნიღბიანი პირი და 17 ადმიანი, რომელიც იატაკზე ზის. მძევალი ამბობს, რომ თავდამსხმელის გარდა 18 არიან. კადრების მიხედვით, არცერთ მათგანი დაჭრილი არ არის.

გამტაცებელი ითხოვს ნაღდი ფულის ადგილზე მიტანას და თვითმფრინავს ადგილის დასატოვებლად, ან მანქანას, რომლითაც მძევლებთან ერთად ფიქრობს წასვლას. მოთხოვნების გაჟღერებას გამტაცებელი მძევალს ავალებს. მისი თქმით, თუ პირობებს შეასრულებენ უსაფრთხოების გარანტიას მისცემს.