გამარჯვებული საქართველოს ლიდერმა, ირაკლი ოქრუაშვილმა განაცხადა, რომ მის მიერ 2011 წელს გაკეთებული განცხადებები, რომ ამერიკელები თავისუფლებას გვართმევენ, შეცდომა იყო. ამის შესახებ ოქრუაშვილმა ტელეკომპანია ფორმულას ეთერში ისაუბრა.

"ბუნებრივია, ის პერიპეტიები, რაც მაშინ ხდებოდა, ასე უკვალოდ ვერ ჩაივლის და ყოველთვის გვემახსოვრება ყველას, არა მხოლოდ მე, არამედ თქვენც. როდესაც გებრძვიან ისეთი წესებით, რომელიც არის სრულიად აკრძალული და ამავდროულად, შენგან მოითხოვენ ისეთი წესებით ბრძოლას, რომელიც არის ცივილიზებული ბრძოლის დროს მიღებული, შეუძლებელია წარმატებას მიაღწიო და თავი დაიცვა. მე წლების განმავლობაში მებრძოდნენ აკრძალული წესებით. შესაბამისად, დროდადრო მიწევდა წითელი ხაზების გადაკვეთა, რაც იმიჯურად მაზიანებდა კიდეც. დღევანდელი გადასახედიდან კი არა მარტო, არამედ მაშინდელი გადასახედიდანაც ეს განცხადება შეცდომა იყო და არასწორი", — განაცხადა ოქრუაშვილმა.

ირაკლი ოქრუაშვილი 2011 წელს ამბობდა, რომ "თუ ჩვენ რუსები გვართმევენ ტერიტორიებს, ამერიკელები გვართმევენ თავისუფლებას და ვერასდროს ტერიტორიებს ვერ გამოვიყენებთ შესაბამისად, თუ არ გვექნება თავისუფლება" და ის ასევე თვლიდა, რომ საჭირო იყო ონკანის გადაკეტვა, რომელიც მდებარეობდა დიღომში, ამერიკის საელჩოში, საიდანაც "მოდიოდა ის ნიაღვარი, რომლითაც იწამლებოდა ქართული საზოგადოება".