პარლამენტის დეპუტატი კახა ოქრიაშვილი ამბობს, რომ საქართველოში ყველაზე "მაგარი" მაჟორიტარია. როგორც მან გადაცემა რეზიუმეში ისაუბრა, მისი მთავარი მოტივაცია კარგი პარლამენტარობა და მაჟორიტარობაა.

"ვთვლი, რომ მე ვარ ყველაზე მაგარი მაჟორიტარი საქართველოში. წინააღმდეგ შემთხვევაში 4-ჯერ ერთი და იგივე მუნიციპალიტეტი არ ამირჩევდა რეკორდული მაჩვენებლით. ყოველთვის პირველ ან მეორე ადგილს ვიკავებ პროცენტული მაჩვენებლით და ახლაც ასე იქნება", — განაცხადა კახა ოქრიაშვილმა.

გარდა ამისა, ოქრიაშვილის თქმით, 2008 და 2012 წლებში ნაციონალურმა მოძრაობამ შესთავაზა მან პარტიის სახელით კენჭისყრა, რადგან იცოდნენ, რომ ნებისმიერ შემთხვევაში გაიმარჯვებდა.

კახა ოქრიაშვილი 2004 წლიდან პარლამენტის წევრია. 2016 წლამდე ის ნაციონალური მოძრაობის დეპუტატი იყო, 2016 წელს კი ქართული ოცნების მაჟორიტარად გიორგი კვირიკაშვილმა წარადგინა და პროფესიონალ, ინიციატივიან ადამიანად დაახასიათა. ქართულ ოცნებასთან უთანხმოების შემდეგ, მან გუნდი დატოვა და პარტია, პროგრესი და თავისუფლება დააფუძნა. ამჟამად ის ძალა ერთობაშიას ბლოკში შედის.