ახალი ავიაკომპანია აირ ჯორჯია ხვალ თბილისის საერთაშორისო აეროპორტში ორ — AIRBUS A320 ტიპის თვითმფრინავს ჩამოიყვანს. როგორც ავიაკომპანიაში აცხადებენ, თვითმფრინავები 180 მგზავრზეა გათვლილი.

ავიაკომპანია აღნიშნული თვითმფრინავებით რეისების განხორციელებას ევროპისა და შუა აზიის მიმართულებით გეგმავს.

აირ ჯორჯიას დამფუძნებელი, გიორგი კოდუა On.ge-სთან საუბარში ამბობს, რომ საქართველოს სამოქალაქო ავიაციის სააგენტოს ფრენებზე ნებართვის მისაღებად უკვე მიმართეს, საიდანაც პასუხს, დაახლოებით ორ თვეში ელოდებიან. ავიაკომპანია რეისების განხორციელებას 2021 წლიდან აპირებს.