ლელოს ვაკის მაჟორიტარი დეპუტატობის კანდიდატი, პარლამენტის წევრი ლევან კობერიძე პანდემიის გამო არჩევნების გადადების საკითხზე საპარლამენტო მსჯელობის გამართვას ითხოვს.

როგორც კობერიძე აცხადებს, აუცილებელია, საჯარო ფორმატში განიხილონ, კორონავირუსის პანდემიიდან გამომდინარე, არჩევნების ჩატარება შეუქმნის თუ არა მოსახლეობის ჯანმრთელობას საფრთხეს.

"მოვუწოდებ პარლამენტის თავმჯდომარეს, არჩილ თალაკვაძესა და ჯანმრთელობის დაცვის კომიტეტის თავმჯდომარეს, დიმიტრი ხუნდაძეს, მოიწვიონ პარლამენტის რიგგარეშე, სპეციალური სხდომა, ინფექციონისტებისა და დარგის სხვა სპეციალისტების ჩართულობით. აუცილებელია, გაფართოებულ და საჯარო ფორმატში გაიხსნას რეალური მსჯელობა საკითხზე — რამდენად მძიმეა არსებულ ვითარებასთან დაკავშირებული პროგნოზი და მოლოდინები. მდგომარეობა უქმნის თუ არა საფრთხეს ჩვენი მოსახლეობის ჯანმრთელობას, არჩევნების ჩატარების შემთხვევაში", — განაცხადა ლევან კობერიძემ.

მისი თქმით, ყველამ ერთად ღია ფორმატში უნდა იმსჯელონ აღნიშნულ საკითხთან დაკავშირებით. ლევან კობერიძე კოლეგებსა და ოპონენტებს მიმართავს, ამოვიდნენ არა თავიანთი ვიწრო პოლიტიკური ინტერესებიდან, არამდე საზოგადოების ინტერესებიდან და მიიღონ სწორი გადაწყვეტილება.