პარლამენტის თავმჯდომარე, არჩილ თალაკვაძე ანდრიუს კუბილიუსის განცხადებას გამოეხმაურა და თქვა, რომ "პოლიტიკური არქეოლოგია" იმ პარტიის მხარდაჭერაა, რომელსაც საქართველოში ბატონი კუბილიუსი გულშემატკივრობს.

"მადლობა რომ განმარტება გააკეთა. რასაც ანდრიუს კუბილიუსი "არქეოლოგიას" ეძახის, ის ჩვენი სამშობლოა. ჩვენი წინაპრები საუკუნეების განმავლობაში იცავდნენ ჩვენს მიწა-წყალს და დავით გარეჯთან დაკავშირებული საკითხები სასაცილო ნამდვილად არ არის. ასეთი შეფასება ჩვენი საზოგადოებისთვის მიუღებელია", — განაცხადა თალაკვაძემ.

ევროპარლამენტის წევრმა და ევრონესტის საპარლამენტო ასამბლეის თანათავმჯდომარემ, ანდრიუს კუბილიუსმა აზერბაიჯანთან საზღვრის დელიმიტაციის საქმეზე ბრალდებულების დაკავებაზე განაცხადა, რომ ეს ბრალდებები პოსტ-საბჭოთა ამბავს აგონებს.

"2007 წლის საკითხების წამოწევა და ორი ცნობილი ექსპერტის ციხეში ჩასმა დაუჯერებელია. მაგონებს ჩვენს შემთხვევებსაც, როდესაც მმართველი პარტია 10-20 წლის საქმეების წამოწევას ცდილობს. მათ პოლიტიკურ არქეოლოგებს ვუწოდებ", — განაცხადა კუბილიუსმა ფორმულას ეთერში.

კუბილიუსმა 13 სექტემბერსაც გააკეთა აღნიშნულზე განცხადება. მან ტვიტერზე დაწერა, რომ ეს მაშინ ხდება, როცა ქართული ოცნება ოპოზიციას რეალური პრობლემებიდან ყურადღების გადატანაში ადანაშაულებს.