მარგვეთისა და უბისის ეპისკოსი მელქისედეკ ხაჩიძე დანიაში საქართველოს ელჩს, გიგი გიგიაძეს მადლობას უხდის, რადგან მან თქვა, რომ დაკავებული ივერი მელაშვილის უდანაშაულობის სჯერა. ამის შესახებ მან მთავარი არხის ეთერში ისაუბრა.

"მე არ შემიძლია, მადლობა არ გადავუხადო გიგი გიგიაძეს. მე მას ვიცნობ ათენიდან, როცა სტუდენტი ვიყავი. ის მოღვაწეობდა ათენში და მეს მას ვიცნობ, როგორც პატიოსან ადამიანს. გამიხარდა, რომ მან თავისი პოზიცია დააფიქსირა, რომ მიიჩნევს, რომ ეს ადამიანები უდანაშაულოები არიან", — აღნიშნა ეპისკოპოსმა.

დანიის სამეფოსა და ისლანდიის რესპუბლიკაში საქართველოს ელჩმა, გიგი გიგიაძემ 7 ოქტომბერს განაცხადა, რომ საქართველო-აზერბაიჯანის საზღვრის საკითხზე კომისიის ყოფილი წევრის, ივერი მელაშვილის მიმართ წარდგენილი ბრალდება აბსურდული და საღ აზრს მოკლებულია.

დღეს, 14 ოქტომბერს მარგვეთისა და უბისის ეპისკოპოსმა მელქისედეკმა განაცხადა, რომ აზერბაიჯანთან საზღვრის დემარკაცია-დელიმიტაციის საქმეზე დაკავებულების შესახებ სინოდის წევრებმა თითქმის არაფერი იციან. ამავე დროს, მან აღნიშნა, რომ ტელევიზიიდან მიღებული ინფორმაციის საფუძველზე საქმეში დანაშაულის ნიშნებს ვერ ხედავს.

სინოდის კიდევ ერთმა წევრმა, ცურტაველმა მიტროპოლიტმა ვახტანგმა თქვა, რომ დაკავებულები ქვეყანას ემსახურებოდნენ და არ შეიძლება, ასე "გავწიროთ გაუაზრებელი მითითებებით".

აღნიშნული განცხადებების საპასუხოდ, დავით გარეჯის არქიმანდრიტი კირიონი ამბობს, რომ მას შემდეგ, რაც სინოდის წევრები ყველაფერს გაიგებენ, სწორ პოზიციას დაიკავებენ.

არქიმანდრიტი კირიონი კარტოგრაფების საქმის ერთ-ერთი მთავარი ფიგურანტია. როგორც ის ყვება, წლების განმავლობაში ის ივერი მელაშვილს 1:200 000 მასშტაბის რუკაზე და საქართველოსთვის სასარგებლოდ საზღვრის გავლებაზე ესაუბრებოდა. კირიონის თქმით, მელაშვილი მას არ უსმენდა და მის შეხედულებებს არ იზიარებდა.

კარტოგრაფების საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასამთავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი:

რომ აზერბაიჯანთან საზღვრის დემარკაცია-დელიმიტაციის საქმეზე დაკავებულების შესახებ სინოდის წევრებმა თითქმის არაფერი იციან. ამავე დროს, მან აღნიშნა, რომ ტელევიზიიდან მიღებული ინფორმაციის საფუძველზე საქმეში დანაშაულის ნიშნებს ვერ ხედავს.