ევროკავშირის ლიდერები შეთანხმდნენ იმ პოზიციაზე, რომ ტერორისტები მეტად შეუტებენ ევროპის ქვეყნებს, თუკი თურქეთის მოქალაქეებისთვის ევროკავშირის საზღვრები გაიხსნება. ამის შესახებ The Telegraph წერს.

ევროკომისიის ანგარიშის თანახმად, ტერორისტები თურქული პასპორტებით გადავლენ ევროპის კონტინენტზე, როგორც კი სავიზო ლიბერალიზაციის პროგრამა ძალაში შევა.

ივნისის ბოლოდან, თურქეთის 75 მილიონ მოქალაქეს უფლება ექნება 90 დღის განმავლობაში დარჩეს ევროკავშირის ქვეყნებში, თუკი ანკარა ანტი-ტერორისტულ და ანტი-კორუფციულ რეფორმებს განახორციელებს.

როგორც გამოცემა წერს, ეს გადაწყვეტილება იყო ბრიუსელის მიერ ნაჩქარევად მიღებული იმ შეთანხმების ნაწილი, რომელსაც უნდა შეეჩერებინა მიგრანტთა ნაკადი თურქეთიდან საბერძნეთისკენ.

მიუხედავად ამისა, ევროკომისიის ანგარიშის თანახმად, შენგენის არეალში გაიზარდა იმ კრიმინალების და ტერორისტების რაოდენობა, რომლებსაც თურქეთის მოქალაეობა აქვს, ან არიან თურქეთში მცხოვრები უცხოელები.

თურქეთის გარდა ევროკომისიამ სავიზო ლიბერალიზაცია კოსოვოს, უკრაინასა და საქართველოს შესთავაზა.