გამოცემა ბათუმელებმა ჩანაწერი გაავრცელა, რომელშიც, მათი ინფორმაციით, ხელვაჩაურის მერი, ჯუმბერ ვარდმანიძე ბათუმელების ჟურნალისტს აგინებს.

გამოცემის ცნობით, ჩანაწერი მაშინაა გაკეთებული, როცა ბათუმელების ჟურნალისტი ხელვაჩაურის მერს წინასაარჩევნო შეხვედრებზე სამსახურებრივი ავტომობილით გადაადგილებასთან დაკავშირებით ინტერვიუსთვის მიმართა.

მათივე ცნობით, ხელვაჩაურის მერის გაღიზიანება მოჰყვა შეკითხვას, რატომ გადაადგილდება ის ქართული ოცნების მაჟორიტარი კანდიდატის საარჩევნო კამპანიაში მერიის, ანუ სახელმწიფოს ავტომანქანით, რასაც კანონი კრძალავს.

მედიის ინფორმაციით, კითხვის მოსმენის შემდეგ ჯუმბერ ვარდმანიძე გაღიზიანდა და ჟურნალისტი სიტყვიერად შეურაცხყო. ჟურნალისტის შენიშვნის შემდეგ, რომ მას, როგორც არჩეულ მერს, არ აქვს უფლება, მოქალაქეებს და ჟურნალიტებს ასე ესაუბროს, მერი კიდევ უფრო აგრესიული გახდა და უცენზურო გინებაზე გადავიდა.

On.ge დაუკავშირდა ჯუმბერ ვარდმანიძეს, რომელმაც განაცხადა, რომ ჩანაწერი არ მოუსმენია და არაფერი იცის.

"არ მახსოვს, არ ვიცი, არ მომისმენია", — გვიპასუხა ჯუმბერ ვარდმანიძემ.

მან, ასევე, დაამატა, რომ როცა მოისმენდა და გადაამოწმებდა, იმ ჩანაწერში ნამდვილად მისი ხმა იყო თუ არა, პირველად On.ge-ს აცნობებდა პასუხს. ჩვენს კითხვაზე, თუ როდის მოიცლიდა რამდენიმეწამიანი ჩანაწერის მოსასმენად, გვიპასუხა, რომ დაკავებული იყო და ზუსტად არ იცოდა.