ევროპული საქართველოს წევრმა, ირაკლი აბესაძემ, ფინანსთა მინისტრის მოადგილეს, გიორგი კაკაურიძეს პარლამენტში ევროპული საქართველოს ფრაქციების სხდომაზე 2021 წლის ბიუჯეტის პროექტის განხილვისას მიმართა. აბესაძის თქმით, შესაძლოა, ბიუჯეტის ვალმა გადააჭარბოს მთლიანი შიდა პროდუქტის 60%-ს.

"მინდა შევეხო ერთ მნიშვნელოვან საკითხს — სახელმწიფო ვალი, რომელიც ნომინალურ მაჩვენებელში, თითქმის, გააორმაგეთ და უფრო მეტად გაზარდეთ, უფრო სწორად და ეკონომიკასთან მიმართებაშიც, თითქმის, გააორმაგეთ. ყველანაირი ნიშნული გადალახეთ. წელს აიღეთ 8 მილიარდი ვალი. გასაგებია, რომ პანდემიას აბრალებთ ამას. მომავალ წელს იღებთ დამატებით 3,2 მილიარდ ლარს ვალად და ადიხართ 57%-ზე ეკონომიკასთან მიმართებით, ოღონდ თუ იქნება 5%-იანი ზრდა, რომელიც თქვენ დაგეგმილი გაქვთ. თუ ეს 5%-იანი ზრდა ვერ იქნება, მაშინ, დიდი ალბათობით, შეიძლება, დაგერღვეთ მეორე პარამეტრი ეკონომიკური თავისუფლების სახით გათვალისწინებული — როდესაც ვალი გადააჭარბებს ჩვენი მთლიანი ეკონომიკის 60%-ს და რეალურად ვიქნებით მართლაც ვალების ეკონომიკა, რომლისგანაც გათავისუფლებას ივანიშვილი 2012 წელს პირდებოდა მოსახლეობას", — განაცხადა ირაკლი აბესაძემ.