შვეიცარიის მთავრობამ მაღალი რისკის შემცველი ქვეყნების სია გაანახლა, რომელშიც, სხვა ქვეყნებთან ერთად, გლობალური ეპიდემიოლოგიური რისკების გათვალისწინებით, საქართველოც მოხვდა.

შვეიცარიაში საქართველოს საელჩოს განცხადებით, საქართველოს მოქალაქეები, რომლებიც 12 ოქტომბრიდან შვეიცარიის ტერიტორიაზე საქართველოდან სხვადასხვა სატრანზიტო მარშრუტით შემოვლენ, სატრანზიტო ქვეყნის ეპიდემიოლოგიური სტატუსის მიუხედავად, ვალდებულნი არიან 10 დღიანი კარანტინი/თვითიზოლაცია გაიარონ. მათივე თქმით, აღნიშნული წესი საქართველოდან შემოსულ ნებისმიერ პირზე ვრცელდება, ხოლო წესის გვერდის ავლის შემთხვევაში ჯარიმა 10 000 შვეიცარიული ფრანკია გათვალისწინებული.

საელჩოს განმარტებით, შვეიცარიაში შემოსვლის შემდეგ, საქართველოს მოქალაქე ვალდებულია დაუყოვნებლივ მოახდინოს თვითიზოლაცია ბინიდან, სასტუმროდან და ა.შ. გაუსვლელად. დაუყოვნებლივ, მაქსიმუმ 2 დღის ვადაში უნდა დაუკავშირდეს კანტონალურ უწყებებს მისი საცხოვრებელი ადგილის მიხედვით და დაემორჩილოს მიღებულ ინსტრუქცია/რეკომენდაციებს .

ასევე, მოქალაქეებს რეკომენდაცია ეძლევათ გამგზავრებამდე კომუნიკაციაში იყვნენ შესაბამის ავიკომპანიებთან, რომლებიც უფლებამოსილნი არიან განსაზღვრონ მგზავრობასთან დაკავშირებული წესები, როგორიცაა Covid-19 ტესტის წარდგენის აუცილებლობა და სხვა.

8 ოქტომბერს საქართველო რისკჯგუფის ქვეყნებში გერმანიამაც შეიყვანა.

10 ოქტომბერს საქართველოში კორონავირუსის 519 ახალი შემთხვევა დადასტურდა. 253 გამოჯანმრთელდა, გარდაიცვალა — 6.

სულ კორონავირუსის 1 1271 შემთხვევაა დადასტურებული. აქედან, 6 119 ადამიანი უკვე გამოჯანმრთელდა. გარდაიცვალა — 78.