ევროპული საქართველოს ბათუმის მაჟორიტარობის კანდიდატი, არმაზ ახვლედიანი ამბობს, რომ მსახიობი რალფ ფაინსი მისი ახლობელია. როგორც მან On.ge-ს უთხრა, როცა ფაინსმა გაიგო, რომ არჩევნებში მონაწილეობდა, მხარდაჭერის ნიშნად ვიდეო გამოუგზავნა. სწორედ ასე განმარტავს ახვლედიანი საარჩევნო კლიპს, სადაც რალფ ფაინსი მას მხარდაჭერას უცხადებს და წარმატებებს უსურვებს.

"გამოთქვა სურვილი ჩემი მხარდაჭერის და გამომიგზავნა ეს ვიდეო. ის ჩემთან ნამყოფია, ჩემი სტუმარი იყო საქართველოში, მონაწილეობდა ჩემი სკოლის სემინარში. ჩვენ გვქონდა მისი ლექცია, ასევე, მისი ფილმის ჩვენება, განხილვა და განსაკუთრებული იყო ძალიან. სპეციალურად ამისთვის იყო ჩამოსული, ჩვენთან სკოლაში, მხოლოდ ამისთვის. ძალიან ახლო ურთიერთობა მაქვს მასთან, უბრალოდ ამის აფიშირებას არ ვაკეთებ. როცა გამომიგზავნა მხარდამჭერი ვიდეო, რა თქმა უნდა, გამოვაქვეყნე", — ამბობს ახვლედიანი.

მისივე ინფორმაციით, საქართველოში სტუმრობის დროს, ფაინსს განსაკუთრებულად ძველი თბილისი მოეწონა და ბევრი ფოტოც გადაიღო.

"მე და რალფი ვართ ძალიან ახლობლები, გვაქვს მრავალწლიანი მეგობრობა და რაც მთავარია, ეს არის ის შემთხვევა, როდესაც მან შესანიშნავად იცის ჩემი სამოქალაქო პოზიცია და პოლიტიკური მსოფლმხედველობა", — აღნიშნა ახვლედიანმა.

გუშინ, 8 ოქტომბერს, ევროპული საქართველოს ბათუმის მაჟორიტარობის კანდიდატის წარდგენისას დიდ ეკრანზე აჩვენეს ვიდეო, სადაც მსახიობი, ჰარი პოტერის მიხედვით გადაღებული ფილმების სერიაში ვოლდემორის როლის შემსრულებელი, რალფ ფაინსი არმაზ ახვლედიანს მხარდაჭერას უცხადებს.

"არმაზ, მოგესალმები, რალფი ვარ. ყველაფერს საუკეთესოს გისურვებ შენი კამპანიისთვის. გასულ წელს ჩვენ დრო ერთად გავატარეთ, შენი გაცნობა ძალიან გამიხარდა და ვიცი, რომ შენ უხელმძღვანელებ პრინციპულ, ჰუმანურ, გამჭვირვალე, პატიოსან და გულწრფელ კამპანიას ყველა მოქალაქის სახელით. გისურვებ წარმატებას და გიგზავნი მხარდაჭერას, კეთილ სურვილებსა და მეგობრობას", — აცხადებს ფაინსი ვიდეოში.

არმაზ ახვლედიანი მაჟორიტარობის კანდიდატად ევროპულმა საქართველომ 20 სექტემბერს დაასახელა. ის 2016 წლამდე ქართულ ოცნების პოლიტსაბჭოს წევრი იყო, შემდეგ კი ოპოზიციაში გადავიდა.