ქართული ოცნება-დემოკრატიული საქართველოს დამფუძნებელმა, ბიძინა ივანიშვილმა განაცხადა, რომ რადიკალურმა ოპოზიციურმა ჯგუფებმა ძალადობა წინასაარჩევნო კამპანიების თანმდევ მოვლენად აქციეს. ხოლო ქართული ოცნების მხარდამჭერები, მათ მიერ მოწყობილ პროვოკაციებს წამოეგნენ. ბიძინა ივანიშვილის განცხადება ქართულმა ოცნებამ ფეისბუქზე გაავრცელა.

"მე ვგმობ ყველანაირ ძალადობას, რაც ზიანს აყენებს წინასაარჩევნო პროცესს და დემოკრატიის ხარისხს ქვეყანაში.

ფაქტია, რომ რადიკალურმა ოპოზიციურმა ჯგუფებმა ძალადობა წინასაარჩევნო კამპანიების თანმდევ მოვლენად აქციეს. უკანასკნელ პერიოდში მათი მხრიდან გახშირდა პროვოკაციები, რასაც, რიგ შემთხვევებში, ჩემდა სამწუხაროდ, წამოეგნენ ქართული ოცნების მხარდამჭერებიც. არის საფრთხე, რომ არჩევნების მოახლოებასთან ერთად, ასეთი ხასიათის ძალადობრივი დაპირისპირებები უფრო გახშირდეს.

როდესაც კონფლიქტი ხდება, ძნელია იმის გარჩევა, ვინ არის ინიციატორი და ვინ-პროვოკაციის მსხვერპლი. ეს განსაკუთრებით ძნელია ჩვენი დასავლელი პარტნიორებისთვის, ვინც არჩევნებს აკვირდება და ვისი შეფასებებიც საარჩევნო პროცესის თაობაზე ქვეყნისთვის უკიდურესად მნიშვნელოვანია.

მინდა მაქსიმალური თავშეკავებისკენ მოვუწოდო ყველას, განსაკუთრებით, "ქართული ოცნების" მხარდამჭერებს - ნუ აყვებით პროვოკაციებს, ნუ მივცემთ რადიკალურ ჯგუფებს იმის საშუალებას, რომ დააზიანონ საარჩევნო გარემო და ქვეყნის საერთაშორისო რეპუტაცია. ძალადობა და ქვის სროლა მათი ხელწერაა, სწორედ ასე მოვიდნენ ისინი თავის დროზე ხელისუფლებაში და დღესაც ასე სურთ გადაფარონ საკუთარი უპერსპექტივობა და გარდაუვალი მარცხი მოახლოებულ არჩევნებში", — აცხადებს ივანიშვილი.

ქართული ოცნების ლიდერი ასევე მიიჩნევს, რომ ქართული საზოგადოების "უპრეცედენტო მხარდაჭერის ფონზე", პარტიის საპროგნოზო მაჩვენებელი 54-დან 60%-მდე მერყეობს, რიგ შემთხვევაში კი, 63%-საც აჭარბებს. მისი თქმით, ქართულ ოცნებას ამჟამად "ძალზე მყარი" პოზიციები აქვს და ამ არჩევნებში "დამაჯერებლად იმარჯვებს".