ევროპული საქართველოს ლიდერებმა, დავით ბაქრაძემ და გიგი უგულავამ, ბათუმის მოსახლეობას პარტიის მაჟორიტარი დეპუტატობის კანდიდატი, არმაზ ახვლედიანი წარუდგინეს.

ბაქრაძის თქმით, დღეს ქვეყანა არის მძიმე გაჭირვებაში, ხოლო ამ დროს ხელისუფლება არ იკლებს ფუფუნებას. ბაქრაძის თქმით, ეს ყველაფერი უნდა შეიცვალოს გარდამტეხი ცვლილებებით, რათა მთავრობა ორიენტირებული იყოს ხალხზე და არა მის კეთილდღეობაზე.

"როდესაც ვსაუბრობთ გარდამტეხ ცვლილებებზე, გარდამტეხი ცვლილებები სჭირდება ქვეყანასაც, ბათუმსაც, აჭარასაც და თითოეული ჩვენგანის ოჯახს.

რა არის ეს გარდამტეხი ცვლილებები? პირველ რიგში ეს არის იმ ხელის ჩაქნევის, უიმედობის, ნიჰილიზმის დამარცხება, რომელიც ამ ქვეყანას მოუტანა ივანიშვილმა და ოცნებამ. დღეს სადაც მივიდვარ, ყველა კითხულობს — გვეშველება რამე? გვეშველება, 23 დღეში გვეშველება, ოღონდ ერთად უნდა დავდგეთ და ერთად უნდა მოვიტანოთ ცვლილებები ამ ქვეყანაში.

ამ უიმედობის ოკეანიდან გამოსასვლელად გვჭირდება სწორდ ისეთი კომპასი და გზის მაჩვენებელი, როგორიც ევროპული საქართველოა. ქვეყნის ეკონომიკის ფეხზე დასაყენებლად გვჭირდება სწორედ ისეთი გზის მაჩვენებელი, როგორიც ევროპული საქართველოა. დიახ, ჩვენი ამოცანაა ეს ქვეყანა გამოვიყვანოთ უმძიმესი ეკონომიკური კრიზისიდან; ჩვენი ვალდებულებაა შევქმნათ 100 000 ახალი სამუშაო ადგილი; შევამციორთ გადასახადები და თითოეულ ოჯახს დავუზოგოთ 2000 ლარი; დავეხმაროთ ყველაზე გაჭირვებულ ადამიანებს და ამისათვის გავაორმაგოთ პენსია, სოციალური დახმარება და დევნილთა დახმარება; ჩვენი ვალდებულებაა, რომ დავეხმაროთ საქართველოს სწორ განვითარებაში, რაც ნიშნავს იმას, რომ თითოეულ ქალაქს და სოფელს დარჩეს მეტი შემოსავალი და ნაკლები წაიღოს მთავრობამ თავისი ბიუროკრატიული ხარჯისათვის.

გარდამტეხი ცვლილება ნიშნავს იმას, როდესაც ხალხი ცხოვრობს კარგად და მთავრობა მოკრძალებულად. დღეს ჩვენ ქვეყანაში ყველაფერი პირიქით ხდება, ჩვენ ვართ მდიდარი მთავრობის ღარიბი ქვეყანა, ფუფუნებაში მაცხოვრებელი მთავრობის სიღატაკეში მაცხოვრებელი მოსახლეობა. ეს უნდა შეიცვალოს და ამას სჭირდება გარდამტეხი ცვლილებები", — განაცხადა დავით ბაქრაძემ.