კონკურენციის სააგენტოში Booking.com-ის წინააღმდეგ განაცხადი შევიდა. სააგენტოს ცნობით, 10 იანვრამდე გადაწყდება, დაიწყება, თუ არა მოკვლევა.

Booking.com-ს ააიპ კონკურენციის სამართლისა და მომხმარებელთა დაცვის ცენტრი უჩივის. აღნიშნული ორგანიზაცია მიიჩნევს, რომ სამართლებრივი პრობლემა Booking.com-ის ხელშეკრულების ერთ-ერთ დებულებაშია, რომლის მიხედვით, სასტუმროებს არ შეუძლიათ უფრო დაბალი ფასები განათავსონ საკუთარ, ან სხვა, Booking.com-ის კონკურენტ ვებგვერდებზე.

ცენტრის დამფუძნებელი და დირექტორი, სოლომონ მენაბდიშვილი On.ge-ს იმ მიზეზებზე ესაუბრა, რის გამოც საქმისწარმოებას ითხოვს:

"კონკრეტულად პრობლემა კონკურენციის სამართლის ნორმების მხრივ ის არის, რომ ხელშეკრულების ერთ-ერთ დებულებაში წერია პირობა, რომ თუ სასტუმროებს, რომლებსაც კონტრაქტი აქვთ დადებული Booking.com-თან, ექნებათ უფრო დაბალი ფასები თავის ვებსაიტზე განთავსებული, ან სხვა პორტალებს, ან Booking.com-ის კონკურენტებს მისცემენ უფრო დაბალ ფასად, შესაბამისად Booking.com-ზეც ავტომატურად უნდა გავრცელდეს ეს დაბალი ფასი. ეს კონკურენციის პრინციპს არღვევს იმიტომ, რომ თვითონ სასტუმროს, ვისაც უნდა, როგორც უნდა, რა ფასადაც უნდა შეუძლია მისცეს."

სოლომონ მენაბდიშვილმა On.ge-ს ასევე უთხრა, რომ აღნიშნული პირობების გამო ევროკავშირის ზოგიერთმა ქვეყანამ Booking.com დააჯარიმა:

"მაგალითად, გერმანიასა და შვეიცარიაში კონკურენციის სააგენტომ მიიღო გადაწყვეტილება და დააჯარიმა [Booking.com] ამ მუხლების გამო. ახლა საფრანგეთშიც მიდის იგივე კომპანიის წინააღმდეგ დავა."

მენაბდიშვილი მიიჩნევს, რომ Booking.com არღვევს "კონკურენციის შესახებ" საქართველოს კანონის მე-7 მუხლს, რაც გულისხმობს კონკურენციის შემზღუდველ ხელშეკრულებას, გადაწყვეტილებას და შეთანხმებულ ქმედებას.

კომპანია Booking.com სასტუმროების, ჰოსტელებისა და გესთაუსების მეპატრონეებს მსოფლიო მასშტაბით აძლევს საშუალებას, საიტზე განათავსონ ინფორმაცია გასაქირავებელი ნომრებისა და ოთახების შესახებ. Booking.com მსოფლიოში ამ სერვისის შემთავაზებელ კომპანიებს შორის ერთ-ერთი ყველაზე პოპულარული რესურსია, რომელსაც მოგზაურები აქტიურად იყენებენ ნომრების დასაჯავშნად.