"ბატონო გახარია, ამერიკის პრეზიდენტს სცალია დებატებისთვის და თქვენ ასეთი მოუცლელი რა გჭირთ, რომ თურმე დებატებისთვის ვერ იცლით?", — ასე მიმართა სტრატეგია აღმაშენებლის ლიდერმა, გიორგი ვაშაძემ საქართველოს პრემიერმინისტრს, გიორგი გახარიას, რომელმაც აღნიშნა, რომ დებატებისთვის მას, ხშირ შემთხვევაში, დრო არა აქვს.

"რეალურად ჩვენ ხომ ვიცით, რომ დებატების გეშინიათ, გეშინიათ მოხვიდეთ და ფაქტებით გესაუბროთ. ასევე, გეშინიათ იმის, რომ საზოგადოების მხრიდან ამაზე მკაცრ გაფრთხილებას მიიღებთ", — განაცხადა ვაშაძემ.

მან პრემიერმინისტრს დებატებში მოწვევა კიდევ ერთხელ შეახსენა და აღნიშნა, რომ ყველა შეკითხვას საზოგადოების წინაშე უნდა გაეცეს პასუხი.

"იქ [დებატებზე] უკვე ამდენი ტყუილის შესაძლებლობა, რასაც ახლა კადრულობთ, ნამდვილად არ გექნებათ. ნუ გეშინიათ, მოდით და საზოგადოებას პასუხი გაეცით. ამერიკის პრეზიდენტს თუ სცალია დებატებისთვის, როგორმე თქვენ, რუსეთის ყოფილ მოქალაქეს, გახარიას დებატებისთვის უნდა გეცალოთ", — თქვა მან.

დღეს, 7 ოქტომბერს, პრემიერმინისტრმა განაცხადა, რომ პარტიული დებატები იქნება, თუმცა მას ხშირ შემთხვევაში ამისთვის დრო არ აქვს და გადაწყვეტილებას პარტია მიიღებს. გახარია აღნიშნავს, რომ ის არასდროს გაქცევია არანაირ შინაარსობრივ დისკუსიას.