არჩევნებამდე ერთი თვით ადრე, ქართული ოცნების თავმჯდომარე ბიძინა ივანიშვილმა და ქართუ ფონდმა თბილისის იპოდრომის ტერიტორია გადასცეს. შედეგად, მმართველ გუნდში ბიძინა ივანიშვილის "კეთილი საქმეების სიას" კიდევ ერთი შემატეს და ქართუ ფონდის გულუხვობის ხსენებაც არ დავიწყებიათ.

On.ge-მ შეაგროვა ქართული ოცნების ლიდერების განცხადებები იპოდრომთან დაკავშირებით. ისინი ყურადღებას, ძირითადად, ივანიშვილის ხელწერაზე, უნიკალურ საჩუქარზე და უპრეცედენტო ქველმოქმედებაზე ამახვილებენ.

პირადად ბიძინა ივანიშვილს და მის ოჯახს გადაუხადა მადლობა კახა კალაძემ ჯერ კიდევ 5 ოქტომბერს, როცა ფონდ ქართუს თავმჯდომარესთან ერთად იპოდრომის ტერიტორიის მერიისთვის გადაცემის მემორანდუმს მოაწერა ხელი. კალაძემ თქვა, რომ აღელვებული და ბედნიერია და ბიძინა ივანიშვილის ქველმოქმედებაზე ისაუბრა.

6 აგვისტოს, როცა პროექტის პრეზენტაცია გაიმართა, თბილისის მერმა ბიძინა ივანიშვილსა და მის ოჯახს მადლობა კიდევ ერთხელ გადაუხადა და კვლავ ისაუბრა ფონდ ქართუს მნიშვნელობააზე. კახა კალაძის აზრით, იპოდრომის ტერიტორიის გადაცემა ამომრჩევლის მოსყიდვა არ არის და მეტიც, მისი თქმით, მერია მზად არის, საჩუქრად მიიღოს ის ტერიტორიებიც, რომელთა ნაწილსაც ნაციონალური მოძრაობის წევრები დიღმის ტყე-პარკში ფლობენ.

პრეზენტაციას საქართველოს მთავრობა თითქმის სრული შემადგენლობით ესწრებოდა. იქვე იმყოფებოდნენ პარტიის სხვა ლიდერებიც და მანამდე გადახდილ საჯარო მადლობებს ახლები დაუმატეს.

პრემიერმინისტრ გიორგი გახარიას აზრით, ქართული ოცნების ლიდერის, ბიძინა ივანიშვილის ხელწერა და ღვაწლი თბილისის ცენტრალური პარკის ახალ პროექტშიც გამოჩნდა. მისი თქმით, "ეს არის უაღრესად მნიშვნელოვანი ხელწერა, თუ როგორ შეიძლება პირადით ემსახურო საზოგადოს".

"რა თქმა უნდა, ამ ხელწერის გამომსახველი არ არის მხოლოდ თბილისის ცენტრალური პარკი. ჩვენ შეგვიძლია გავიხსენოთ ბათუმის ბოტანიკური პარკი, თბილისის ბოტანიკური პარკი, დენდროლოგიური პარკი, ახლა ცენტრალური პარკი და რა თქმა უნდა, არ უნდა დაგვავიწყდეს მთაწმინდის გამწვანების პროექტი", — განაცხადა გახარიამ თბილისის ცენტრალური პარკის პრეზენტაციაზე.

ვიცე-პრემიერი მაია ცქიტიშვილიც ამბობს, რომ იპოდრომის გადაცამა "ბატონი ბიძინას" და მისი ოჯახის ხელწერაა, რომელიც "წლების განმავლობაში ქვეყნის ზრუნვაზეა მიმართული". მან მაგალითად დენდროლოგიური პარკი და ქუთაისის უნივერსიტეტი მოიყვანა.

"თქვენ ვერ ნახავთ საქართველოს ვერც ერთ რეგიონს, სადაც ქართუ ფონდს არ აქვს გაკეთებული ინვესტიცია, ეს იქნება ძეგლების აღდგენა, საგანმანათლებლო პროექტები, თეატრებზე ზრუნვა, საზოგადოებრივი თუ სპორტული სივრცეები და ასეთი ტიპის მწვანე პროექტები", — აღნიშნა ცქიტიშვილმა.

ივანიშვილის ხელწერაზე საუბრობს საქართველოს პარლამენტის თავმჯდომარეც. არჩილ თალაკვაძის თქმით, "ქველმოქმედება საქვეყნო საქმეებში" ქართული ოცნების ლიდერის, ბიძინა ივანიშვილის უცვლელი ხელწერაა.

მისივე თქმით, იპოდრომის ტერიტორიაზე ცენტრალური პარკის გაშენება — ეს არის "უნიკალური საჩუქარი" არა მარტო დედაქალაქისთვის, არამედ მთელი ქვეყნისთვის.

"უნიკალურ საჩუქარზე" ამახვილებს ყურადღებას პარტიის ერთ-ერთი ლიდერი, მამუკა მდინარაძეც. "მორიგი უნიკალური საჩუქარი ბიძინა ივანიშვილისა და მისი ოჯახისგან" — სწორედ ასე დაიწყო მან ფეისბუქპოსტი და აღნიშნა, რომ იპოდრომი თბილისის კიდევ ერთი სავიზიტო ბარათი იქნება.

უნიკალური არა, მაგრამ "შესანიშნავი საჩუქარია" იპოდრომის გადაცემა ეკონომიკის მინისტრ ნათია თურნავასთვის. მან ამას "ბატონი ბიძინა ივანიშვილის" და მისი ოჯახისგან მორიგი უპრეცედენტო ქველმოქმედებაც უწოდა და არ დაავიწყდა კიდევ ერთხელ აღენიშნა, რომ ქართუს 25 წლის განმვალობაში არაერთი ქველმოქმედება განუხორციელებია.

"უპრეცედენტო ქველმოქმედებაა" იპოდრომის ტერიტორიის მუნიციპალიტეტისთვის გადაცემა დეპუტატ კახა კუჭავასთვისაც.

ყოფილი იპოდრომის ტერიტორიის გადაცემაში მოსყიდვის ნიშნებს ვერ ხედავს განათლების მინისტრი, მიხეილ ჩხენკელი და ტერიტორიის მუნიციპალიტეტისთვის გადაცემას "უბრალოდ კარგ საქმეს" უწოდებს.

სანამ მმართველი პარტიის წარმომადგენლები ლიდერს მადლობებს უხდიდნენ, ოპოზიცია იპოდრომის მერიისთვის გადაცემით ამომრჩევლის შესაძლო მოსყიდვის რისკებზე საუბრობდა. ოპოზიციაში მიიჩნევენ, რომ ეს წინასაარჩევნო "ფარსია". მეტიც, ევროპული საქართველოს დეპუტატის, ირაკლი აბესაძის ინფორმაციით, ქართული ოცნების ლიდერმა იპოდრომის ტერიტორია ორად გაყო და მერიას მხოლოდ ეკონომიკურად ნაკლებად მომგებიანი ნაწილი გადასცა. ქართუ ფონდი ამას არ ადასტურებს და აღნიშნავს, რომ ივანიშვილის საკუთრებაში არსებული იპოდრომის ტერიტორია თბილისს სრულად გადაეცა.