ქუთაისის 31-ე საჯარო სკოლის დირექტორის, ირმა შველიძის თქმით, პირველკლასელისთვის Covid-19-ის დადასტურების გამო, სკოლა დღეიდან დისტანციური სწავლების რეჟიმზე გადავიდა. შველიძე On.ge-სთან საუბარში აცხადებს, რომ მოზარდისთვის კორონავირუსის დადასტურების შესახებ მას მშობელმა აცნობა.

"დედას დაუდასტურდა თავიდან და გუშინ უკვე შვილზეც იყო დადებითი პასუხი. მივიღეთ რეკომენდაცია ჯანდაცვის სამინისტროდან ორკვირიან კარანტინში გადავსულიყავით. 1 და 2 ოქტომბერს გვყავდა ბავშვები სკოლაში, მათ შორის ის მოსწავლეც ვისაც Covid-19 დაუდასტურდა", — ამბობს ირმა შველიძე.

დირექტორის თქმით, შესაბამის სამსახურებს მათ უკვე გადასცეს მოსწავლის კონტაქტები.

დღეს ქვეყანაში კორონავირუსის 578 ახალი შემთხვევა გამოვლინდა, 375 ადამიანი გამოჯანმრთელდა. სულ კორონავირუსის 8 696 შემთხვევაა დადასტურებული. აქედან 4 619 ადამიანი უკვე გამოჯანმრთელდა, გარდაიცვალა — 52.