პროკურატურამ მარნეულში, მომხდარ ინციდენტზე 3 პირს ბრალი წარუდგინა. უწყების ცნობით, ძალადობის ფაქტზე დაკავებულ ლ.ქ-ს არჩევნების დანიშვნის დღიდან, არჩევნების საბოლოო შედეგების შეჯამებამდე, საარჩევნო კომისიის განთავსების ადგილას ჩადენილი ძალადობისთვის ბრალი წარედგინა.

"გამოძიებით დადგინდა, რომ 2020 წლის 29 სექტემბერს, დაახლოებით 14:00 საათზე, ქ.მარნეულში, №22-ე მარნეულის საოლქო საარჩევნო კომისიის განთავსების ადგილზე, ურთიერთშელაპარაკებისას, ლ.ქ.-მ იძალადა ც.ბ.-ს მიმართ.

გამოძიებით ასევე დადგინდა, რომ 2020 წლის 29 სექტემბერს, დაახლოებით 21:00 საათზე, ქ.მარნეულში, შოთა რუსთაველის ქუჩა №67-ის მიმდებარე ტერიტორიაზე, ურთიერთშელაპარაკებისას, გ.შ.-მ, სხვა პირებთან ერთად ჯგუფურად ძალადობა განახორციელა დ.ქ.-ს, ლ.ქ.-ს და გ.ქ.-ს მიმართ, ხოლო გ.ჯ.-მ, გ.შ.-სთან და სხვა პირებთან ერთად, ჯგუფურად, იძალადა გ.ქ.-ს მიმართ", — ნათქვამია განცხადებაში.

პროკურატურის ინფორმაციით, ასევე ძალადობის ფაქტებზე გ.შ.-ს ბრალდება 126-ე მუხლის პირველი პრიმა ნაწილის "ბ" და "გ" პუნქტებით (ძალადობა, ჩადენილი ჯგუფურად, ორი ან მეტი პირის მიმართ), ხოლო გ.ჯ-ს 126-ე მუხლის პირველი პრიმა ნაწილის "ბ" ქვეპუნქტით (ძალადობა, ჩადენილი ჯგუფურად) წარედგინათ.

უწყების ინფორმაციით, ბრალდების მხარე კანონით დადგენილ ვადაში მიმართავს სასამართლოს ბრალდებულებისთვის აღკვეთის ღონისძიების სახით პატიმრობის უზრუნველყოფით გირაოს — 5 000 ლარის შეფარდების შუამდგომლობით. სისხლის სამართლის საქმეზე გამოძიება გრძელდება.

მარნეულში 29 სექტემბერს, ნაციონალური მოძრაობის აქტივისტებსა და ქართული ოცნების აქტივისტებს შორის დაპირისპირება მოხდა, რა დროსაც ნაციონალური მოძრაობის წევრებს ფიზიკურად გაუსწორდნენ, ასევე თავს დაესხნენ პირველი არხისა და ტელეკომპანია მთავარის ჟურნალისტებსაც.