ქართული ოცნების აღმასრულებელი მდივანი აცხადებს, რომ მარნეულში მათ აქტივისტებს ნაციონალური მოძრაობის წარმომადგენლებმა "დედა შეაგინეს" და მათი რეაქცია ამას მოჰყვა, "რაც ძალიან სამწუხაროა".

პარლამენტის ყოფილმა თავმჯდომარემ ასევე აღნიშნა, რომ ინციდენტები როგორც ბოლნისში, ასევე მარნეულში მოხდა ქართული ოცნების ოფისებთან. კობახიძე სვამს კითხვას, "რა ესაქმებოდათ ნაციონალური მოძრაობის წარმომადგენლებს ან ერთ ან მეორე შტაბთან", მიუხედავად იმისა რომ მარნეულში ქართული ოცნების ოფისი ცესკოს გვერდითაა.

"მარნეულში ქართული ოცნების საარჩევნო შტაბთან მივიდნენ ნაცმოძრაობის წარმომადგენლები, რომლებიც პროფესიონალი პროვოკატორები არიან, ყველამ იცის ეს სახელები და გვარები, რამდენიმე ინციდენტი მოაწყვეს მათ მთელი ამ წლების განმავლობაში. როგორ ხდება რომ მაინცდამაინც მათ უკავშირდებათ ეს ინციდენტები? მივიდნენ და დედა შეაგინეს ქართული ოცნების მხარდამჭერებს, როლებიც რამდენიმე ათეული იდგა საარჩევნო შტაბის წინ", — განაცხადა კობახიძე.

მისივე თქმით, ქართული ოცნების აქტივისტები გააფრთხილეს, რომ "პროვოკაციებს" არ აყვნენ.

"სადღაც ვახერხებთ ამას, რომ დედის გინების მიუხედავად არ ახდენენ რეაგირებას, სადღაც ვერ ხერხედება ეს ყველაფერი. [..] არც ერთ შემთხვვაში ძალადობს არ აქვს გამართლება, მაშინაც კი, როცა დედას გაგინებენ", — განაცხადა კობახიძემ.

გუშინ, 29 სექტემბერს, მარნეულში დაპირისპირება მოხდა, რის შედეგადაც დაშავდნენ ჟურნალისტები და აქტივისტები.

ბოლო პერიოდში პარტიები ხშირად ადანაშაულებენ ოპონენტებს თავდასხმასა და პროვოკაციის მოწყობაში. როგორც ერთიანი ნაციონალური მოძრაობისა და ევროპული საქართველოს წარმომადგენლები აცხადებენ, მმართველი გუნდის მხრიდან მათზე ზეწოლა ხორციელდება, რასაც ქართულ ოცნებაში უარყოფენ.