დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

აჭარის მთავრობის თავმჯდომარის, თორნიკე რიჟვაძის განცხადებით, ახალი პროტოკოლით, დღის ბოლომდე აჭარაში კორონავირუსისგან 400-მდე კლინიკურად გამოჯანმრთელებული პაციენტი იქნება. მისივე თქმით, პაციენტები გაეწერებიან როგორც ჰოსპიტალებიდან, ისე კოვიდსასტუმროებიდან.

"ვითარება არის რთული, მაგრამ აბსოლუტურად მართვადი და ჩვენი მონაცემებით არც ერთი პაციენტი და არც ერთი ინფიცირებული არ გვყავს ძირითადი სამედიცინო სერვისის გარეშე", — განაცხადა რიჟვაძემ.

დღეს, 28 სექტემბერს ცნობილი გახდა, რომ პირი, რომელსაც ტესტირების ჩატარებიდან მე-12 დღეს კორონავირუსის სიმპტომები არ აღენიშნება განმეორებითი ტესტირების გარეშე გამოჯანმრთელებულად ჩაითვლება.

რაც შეეხება სიმპტომიან პაციენტებს, რომლებიც საავადმყოფოში იმყოფებიან, გამოჯანმრთელებამდე მინიმალური ხანგრძლივობა 13 დღეა — აქედან 10 დღე არის სიმპტომების, ხოლო სამი უსიმპტომობის პერიოდი.

"შესაძლოა საჭირო იყოს კლინიკური გადაწყვეტილების მიღება, კლინიკურად რამდენად მზადაა დაუბრუნდეს სოციალურ ცხოვრებას, თუმცა ეპიდემიოლოგიური რისკების თვალსაზრისით, ასეთი პაციენტები მე-14, მე-15 დღიდან, თუ სამი დღე არიან სიმპტომებისგან თავისუფალი, რისკს არ წარმოადგენენ", — აღნიშნა ჯანდაცვის მინისტრის მოადგილემ, გაბუნიამ.

ჯანდაცვის მინისტრი ამბობს, რომ 24-საათიან შუალედში ორჯერ ტესტის ჩატარების რეკომენდაცია საერთაშორისო დონეზე აღარ არის.

"ან ერთჯერადი ტესტირებით ან ტესტირების გარეშე პირს შეიძლება მიენიჭოს გამოჯანმრთელების სტატუსი, თუ სიმპტომებისგან თავისუფალი პერიოდი დადგენილია იმ დღეების მიხედვით, როგორც ამაზე შევთანხმდით", — განაცხადა გაბუნიამ.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: