უშაკოვის ქუჩაზე პარტია სტრატეგია აღმაშენებლის ბანერი დააზიანეს. ამის შესახებ ინფორმაცია პარტიის პრესსამსახურმა გაავრცელა.

როგორც On.ge-ს პარტიაში განუცხადეს, პარტიის ბანერი უკვე მეორედ დააზიანეს და ორივე შემთხვევაზე დაუკავშირდნენ პოლიციას. მათივე თქმით, არცერთი საქმე გამოძიებული არ არის. პარტიის მოთხოვნაა, მომხდარზე გამოძიება დაიწყოს.

"ეს კიდევ ერთხელ არის იმის მანიშნებელი, რომ სტრატეგია აღმაშენებელთან დაკავშირებით, როგორც ჩანს, გაღიზიანებულია კონკრეტული ჯგუფი, რომელიც ჩვენს პლაკატებს მიზანმიმართულად აზიანებს და ამით ცდილობს, რომ დაგვიპირისპირდეს", — განაცხადა პარტიის სპიკერმა, თეონა აქუბარდიამ.

On.ge-ს შინაგან საქმეთა სამინისტროში განუცხადეს, რომ საქმეზე გამოძიება სისხლის სამართლის კოდექსის 187-ე მუხლით აღიძრა, რაც ნივთის დაზიანებას ან განადგურებას გულისხმობს.