საერთაშორისო რესპუბლიკურმა ინსტიტუტმა (IRI) განაცხადა, რომ არჩევნების შეფასების კომისია (TEAM) საქართველოში ჩამოვიდა. აღნიშნული კომისია 31 ოქტომბრის არჩევნებს დააკვირდება.

მათი ცნობით, IRI-სთვის მნიშვნელოვანი იქნება ისეთი საკითხები, რომლებიც არჩევნებზე გავლენას ახდენს — მედიის თავისუფლება და გამჭვირვალობა, საარჩევნო კამპანიის ფინანსები, პოლიტიკური პარტიების კამპანიები, ასევე, ხმის მიცემისას, კორონავირუსის წინააღმდეგ უსაფრთხოების დასაცავად, რა ზომები იქნება მიღებული.

IRI-ს სადამკვირვებლო გუნდი მოიცავს მრავალფეროვან ჯგუფს, რომელშიც ერთიანდება ხუთი ანალიტიკოსი. ეს ჯგუფი არჩევნების ყველა ფაზას დააკვირდება და კვლევების ანგარიშებს პერიოდულად გამოაქვეყნებს. კვლევისთვის საჭირო ინფორმაციას კი ინტერვიუს გზით მიიღებენ მთავრობის ოფიციალური წარმომადგენლებისგან, საარჩევნო ადმინისტრაციისგან, პოლიტიკური პარტიების ლიდერებისგან, სამოქალაქო საზოგადოებისა და მედიისგან.

განცხადებაში ნათქვამია, რომ IRI-სა და საქართველოს ცენტრალურ საარჩევნო კომისიას 25-წლიანი თანამშრომლობა აკავშირებთ და ამჯერადაც სწორედ ცესკოს მოწვევით დააკვირდებიან არჩევნებს.