თბილისის მერია გეგმავს წაახალისოს ელექტრომობილები, სწორედ ამიტომ, ელექტრომობილი ტაქსებისთვის სპეციალური პარკირების ადგილების გამოყოფას იწყებს. დედაქალაქის მუნიციპალიტეტმა ამ ინიციატივის მხარდასაჭერად საკრებულოს მიმართა და საკითხს დღეს განიხილავენ. სპეციალური პარკირების ადგილების სტატუსი ელექტრო ავტომობილების დამუხტვისთვის განკუთვნილ ლოკაციებსაც მიენიჭებათ.

მერიის ინფორმაციით, ამგვარ პარკინგებზე შიდაწვისძრავიანი ავტომანქანების გაჩერება აკრძალული იქნება. შესაბამისი ცვლილება "სატრანსპორტო საშუალებების პარკირების რეგულირების წესში" უნდა შევიდეს.

თბილისის მერიამ ელექტრომობილების დასამუხტი ორი სადგური დედაქალაქში მიმდინარე წლის ნოემბერში გახსნა და მათი ელექტროენერგიით მომარაგება საკუთარ თავზე აიღო, შესაბამისად, ბიუჯეტიდან იხდის მათ მიერ დახარჯულ თანხას. საქართველოში ამ დროისათვის 50-მდე ელექტრომობილი მოძრაობს.