თამარ ბაჩალიაშვილის ოჯახის ადვოკატის, მიხეილ რამიშვილის განცხადებით, სახელმწიფო უსაფრთხოების სამსახურის ყოფილი თანამშრომელი თამარ ბაჩალიაშვილს დავალებებს მეხსიერების ბარათით აძლევდა. რამიშვილის თქმით, დღეს პროკურატურას სწორედ ახალი მოწმის გამოკითხვის ოქმი წარუდგინა. მას მედიასთან სუს-ის ყოფილი თანამშრომლის ვინაობა არ დაუსახელებია.

"მოვიტანე ერთი გამოკითხვის ოქმი, რომელიც 3 აგვისტოთი თარიღდება. ამავე დღეს დამიკავშირდა სუს-ის ყოფილი თანამშრომელი, რომელიც გამოკითხვის ოქმში პირადად დეტალურად აღწერს, როგორი ურთიერთობა და როგორი კონტაქტი ჰქონდა თამარ ბაჩალიაშვილთან. როგორ გადასცემდა გარკვეული წლების წინ მეხსიერების ბარათებს და როგორ აძლევდა გარკვეულ მითითებებს. მიუთითებს გვარს და სახელებს, რაც წერია ამ გამოკითხვის ოქმში. ამ თანამშრომლის სახელს და გვარს და სხვა ინფორმაციას მე მივაწვდი გამოძიებას", — განაცხადა რამიშვილმა ჟურნალისტებთან საუბრისას.

სახელმწიფო უსაფრთხოების სამსახურში On.ge-ს განუცხადეს, რომ ისინი პირზე, რომლის იდენტიფიცირება ადვოკატმა არ მოახდინა, კომენტარს ვერ გააკეთებენ.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ბაჩალიაშვილის საქმეზე გამოძიება 143-ე მუხლით დაიწყო, რაც თავისუფლების უკანონო აღკვეთას გულისხმობს, შემდეგ კი, 24 ივლისს გამოძიებას სისხლის სამართლის კოდექსის 115-ე მუხლი დაემატა, რაც თვითმკვლელობამდე მიყვანას ითვალისწინებს.